‘ఒక లైలా కోసం’ సినిమాతో తెలుగు తెరకు పరిచయం అయింది పూజ హెగ్డే. అటుపై వరుణ్ తేజ్ హీరోగా నటించిన ‘ముకుంద’ సినిమాలో “గోపికమ్మ”గా అలరించిన ఈ ముద్దుగుమ్మ తెలుగులో మరో సినిమాకి సంతకం చేయనే లేదు. అశుతోష్ గోవారికర్ తెరకెక్కించిన ‘మొహంజో దారో’ చిత్రం తన కెరీర్ ని మార్చేస్తుందని భావించి ఏడాదిన్నర పాటు ఆ సినిమాకే కేటాయించిన పూజ మధ్యలో కొన్ని అవకాశాలు వచ్చిన తిరస్కరించింది. తీరా ఆ సినిమా విడుదలై ఫలితం తారుమారయ్యిందని తెగ భాదపడిపోతుందట.
ఏడాదికి పైగా ఒకే సినిమాకి పరిమితమవడం అంటే హీరోలే వందలసార్లు ఆలోచిస్తారు. అలాంటిది హీరోయిన్ అయ్యుండి పూజ ఈ ఫీట్ చేసింది. ఈ సినిమాతో బాలీవుడ్ లో తన దశ తిరుగుతుందని భావించి అల్లు అర్జున్ సినిమాకి కూడా నో చెప్పింది ఈ ముంబై అమ్మడు. దాంతో హీరోయిన్ వెతుకులాటలో నిమగ్నమయ్యారు దువ్వాడ జగన్నాధం అండ్ టీమ్. అయితే పూజ ఇప్పుడు ఈ సినిమాలో నటించేందుకు సుముఖంగా ఉందట. అందుకు చిత్ర బృందం కూడా పాజిటివ్ గానే ఉన్నట్టు తెలుస్తోంది. ఏమైనా, ఇలాంటి తడబాటు తగదమ్మా.. గోపికమ్మా!
