యంగ్ రెబల్ స్టార్ ప్రభాస్ హడావుడి చేయడు. ఉపన్యాసాలు ఇవ్వడు. కానీ దెబ్బ మాత్రం అదుర్స్ అనేలా ఉంటాయి. బాహుబలి సినిమాతో అంతర్జాతీయ గుర్తింపు సాధించినప్పటికీ గర్వంతో ఊగిపోకుండా అదే కష్టాన్ని నమ్ముకున్నారు. సుజీత్ దర్శకత్వంలో సాహో మూవీ చేస్తున్నారు. ఈ సినిమా పూర్తి కాకముందే.. రాధాకృష్ణ దర్శకత్వంలో మరో మూవీ చేస్తున్నారు. ఈ సినిమా షూటింగ్ ఇటలీలో జరుగుతోంది. ఈ చిత్రాల కథల గురించి ఏ విషయం బయటికి రాలేదు గానీ.. రెండూ ప్రపంచవ్యాప్తంగా రిలీజ్ అయ్యేలా తెరకెక్కిస్తున్నారు. అన్ని భాషలవారు కనెక్ట్ అయ్యే కథలను ఎంచుకున్నట్టు తెలిసింది. ఇలా సినిమా విషయాల్లోనే కాదు. బిజినెస్ లోను తనదైన శైలిలో సైలంట్ గా విస్తరణకు ప్లాన్ వేస్తున్నట్టు తెలిసింది.
తెలుగు రాష్ట్రాల్లోని అనేక పాత థియేటర్లని కొనుగోలు చేస్తున్నట్లు తెలిసింది. అందరికీ సినిమా ఏరియాగా పేరొందిన స్థలంలోనే ఆధునిక థియేటర్లను నిర్మించే ప్లాన్ వేసినట్లు సమాచారం. ఇప్పటికే కొన్ని థియేటర్లను కొనేసి పనులు మొదలెట్టినట్లు టాక్. ఏషియ‌న్ సినిమాస్ అధినేత సునీల్ నారంగ్ తో క‌లిసి మహేష్ మ‌ల్టీప్లెక్స్ బిజినెస్‌లోకి దిగారు. రెండు తెలుగు రాష్ట్రాల్లో దాదాపు 25 మ‌ల్టీప్లెక్స్ లు నిర్మించాల‌ని ప్లాన్ చేస్తున్నారు. అందుకే అనేకమంది టాప్ హీరోలు ఆ బాటలో రావడానికి ఆలోచిస్తున్నారు. వారు ఆలోచనలో ఉండగానే ప్రభాస్ ఆచరణలోకి దిగిపోయారు. ఇదే టాప్ హీరోల్లో అలజడి రేపుతోందని ఫిలిం నగర్ వాసులు చెప్పుకుంటున్నారు.
