ఇటీవల “టాక్సీవాలా” చిత్రంతో సూపర్ సక్సెస్ సొంతం చేసుకొని ప్రస్తుతం సెలబ్రేషన్ మోడ్ లో ఉన్న తెలుగమ్మాయి ప్రియాంక జవాల్కర్ కి ఆఫర్లు క్యూ కడుతున్నాయి. ఆల్రెడీ తెలుగులో రెండు సినిమాలతోపాటు తమిళం నుంచి కూడా ఆఫర్లు వస్తుండడమే ఇందుకు కారణం. అయితే.. వీటితోపాటు మరో భారీ ఆఫర్ కూడా ప్రియాంక చెంతన చేరే అవకాశం ఉందని తెలుస్తోంది. రవితేజ కథానాయకుడిగా వి.ఐ.ఆనంద్ దర్శకత్వంలో తెరకెక్కనున్న “డిస్కో రాజా” (వర్కింగ్ టైటిల్) చిత్రంలో ఆల్రెడీ మెయిన్ లీడ్ గా “నన్ను దోచుకుందువటే” ఫేమ్ నభా నటేష్ ఎంపికవ్వగా.. మరో హీరోయిన్ గా నటించే అవకాశం ప్రియాంక జవాల్కర్ దక్కించుకొందని సమాచారం.
ఇటీవల “అమర్ అక్బర్ ఆంటోనీ” చిత్రంతో హ్యాట్రిక్ ఫ్లాప్స్ అందుకొన్న రవితేజ.. వి.ఐ.ఆనంద్ సినిమా విషయంలో చాలా జాగ్రత్తగా వ్యవహరిస్తున్నాడు. సూపర్ నేచురల్ థ్రిల్లర్ గా తెరకెక్కనున్న ఈ చిత్రాన్ని “నేల టికెట్టు” చిత్రాన్ని నిర్మించిన సంస్థ నిర్మిస్తుండగా.. వచ్చే నెల నుంచి సెట్స్ కు వెళ్లనుంది. మరి ఈ సినిమాలో ప్రియాంక ఆఫర్ దక్కించుకోగలిగిందంటే.. కథానాయికగా ఒక మెట్టు ఎక్కినట్లే.
