బాలీవుడ్ రాధికా ఆప్టే ఏమి చేసినా సంచలనమే. మనసులో ఉన్నదీ ఉన్నట్టు బయటికి చెప్పి వార్తల్లో నిలుస్తుంటుంది. ధోనీ, రక్తచరిత్ర, లెజెండ్‌, లయన్ చిత్రాలతో తెలుగు వారికి పరిచయమైన ఈ బ్యూటీ గతంలో తెలుగు చిత్ర పరిశ్రమలో హీరోయిన్లని హీనంగా చూస్తారని చెప్పి పరిశ్రమకు దూరమైంది. అనంతరం దక్షిణాదికి చెందిన ఓ నిర్మాత తనను పడక గదిలోకి రమ్మని పిలిచాడని చెప్పి బ్రేకింగ్ న్యూస్ గా మారింది. తాజాగా ఓ ఇంటర్వ్యూ లో పాల్గొన్న ఆమె ఓ అగ్ర హీరో చెంప పగలగొట్టానని చెప్పి షాకిచ్చింది. బాలీవుడ్ నటి నేహా ధూపియా టాక్‌ షోకు హాజరైన రాధిక తన సినీ కెరీర్‌లో ఎదురైన కొన్ని అనుభవాలను పంచుకుంది.
“ఓ సినిమా సెట్స్‌లో తొలిరోజు ప్రముఖ దక్షిణాది హీరో నా కాలు తడమటం ప్రారంభించారు. నేను షాక్‌ అయ్యా.. అంత వరకూ మా ఇద్దరికి మధ్య పరిచయం కూడా లేదు. మరో ఆలోచన లేకుండా అతడి చెంప పగలగొట్టాను” అని చెప్పింది. ఈ టాపిక్ మాత్రమే కాకుండా మరో విషయంలోనూ సోషల్ మీడియాలో రాధికా ట్రెండ్ అవుతోంది. ఇటీవల రాధికా ఆప్టే బీచ్‌లో బికినీతో ఉన్న ఫొటోను పోస్ట్‌ చేశారు. దీంతో నెటిజన్లు ఆమెను విమర్శించారు. దీనికి రాధిక ఘాటుగానే సమాధానమిచ్చింది. “బీచ్‌లో చీర కట్టుకోమంటారా?” తిరిగి ప్రశ్నించి నెటిజనుల నోరు మూయించింది.
