నాన్నకు ప్రేమతో, సరైనోడు, ధృవ వంటి విజయాలతో లక్కీ హీరోయిన్ అంటూ ఫిట్ బ్యూటీ రకుల్ ప్రీత్ సింగ్ పేరు తెచ్చుకుంది. టాలీవుడ్ టాప్ హీరోయిన్స్ జాబితాలో చోటు ఇచ్చేసారు. అందుకే మహేష్ ద్విభాషా చిత్రం స్పైడర్ లో అవకావం ఇచ్చారు. స్పైడర్ ద్వారా కోలీవుడ్ లోను అదరగొట్టాలనుకుంది. కానీ అనుకున్నదొకటి.. అయ్యిందొకటి అనే తీరు అయింది. వరుసగా సినిమాలు వస్తాయనుకుంటే చేతిలో ఉన్న సినిమాలు సైతం వెనక్కి వెళ్లి పోయాయి. స్పైడర్ చిత్ర నిర్మాణంలోనే విజయ్, సూర్య, కార్తీలతో నటించే అవకాశాలు వచ్చాయి. స్పైడర్ ఫెయిల్ కావడంతో విజయ్ సినిమా అవకాశం చేజారింది. సూర్య చిత్రంలోనూ రకుల్‌ను పక్కనపెట్టారనే విషయం ఆమెను బాగా కుంగదీసింది.
ఆ క్షణంలో కార్తీతో జతకట్టిన ధీరన్‌ అధికారం ఒండ్రు చిత్రం విజయం కొత్త ఉత్సాహాన్నిచ్చింది. ఈ హిట్ సూర్యకు జంటగా నటించే అవకాశం తిరిగి తెచ్చిపెట్టింది. అంతేకాదు కార్తీతో మరోసారి జతకట్టే ఛాన్స్ కొట్టేసింది. కార్తీ ప్రస్తుతం పాండిరాజ్‌ దర్శకత్వంలో సూర్య నిర్మిస్తున్న కడైకుట్టి సింగం చిత్రంలో నటిస్తున్నారు. దీని తర్వాత రజత్‌ దర్శకత్వంలో సినిమా చేయనున్నారు. ఇందులో కార్తీకు జంటగా నటి రకుల్‌ప్రీత్‌సింగ్‌ను ఎంపిక చేసినట్లు సమాచారం. పోయిందనుకున్న తన లక్ తిరిగి రావడంతో రకుల్ ప్రీత్ సింగ్ ఆనందానికి అవధుల్లేకుండా పోయింది.
