తమిళ హీరోలు తెలుగులో పాపులర్ అయిన విధంగా.. తెలుగు హీరోలు తమిళంలో పాపులర్ కాలేకపోయారు. అలా పాపులర్ అయ్యే అవకాశం రామ్ చరణ్ కి వచ్చినప్పటికీ వదులుకున్నారని ఫిలిం నగరవాసులు చెప్పుకుంటుంటారు. ఎందుకు అలా అంటున్నారో వివరాల్లోకి వెళితే.. తమిళ ప్రముఖ దర్శకుడు మణిరత్నం తాజాగా తెరకెక్కించిన చిత్రం “నవాబ్”. ఈ మూవీ తెలుగు, తమిళ భాషల్లో ఈ నెల 27వ తేదీన విడుదల చేశారు. తెలుగు రాష్ట్రాల్లో ఈ మూవీకి కలక్షన్స్ ఓ మోస్తరుగా ఉన్నప్పటికీ తమిళనాట ఈ సినిమా భారీ ఓపెనింగ్స్ రాబట్టి.. బ్లాక్ బస్టర్ దిశగా దూసుకుపోతోంది. ఈ చిత్రంలో ప్రధానమైన పాత్రల్లో కనిపించిన శింబు, అరుణ్ విజయ్, అరవింద స్వామి ప్రేక్షకులను ఆకట్టుకున్నారు.
ముఖ్యంగా శింబు పాత్ర మిగతా పాత్రలకన్నా ఎక్కువగా ప్రభావం చూపుతోందనే టాక్ వినిపిస్తోంది. దీంతో ఈ పాత్ర కోసం మొదటగా మణిరత్నం రామ్ చరణ్ ని సంప్రదించారని సమాచారం. ఆ రోల్ నచ్చినా చెరీ బిజీ షెడ్యూల్ కారణంగా నో చెప్పారు. ఆ తర్వాత ఆ రోల్ శింబు వద్దకి వెళ్ళింది. అతను సూపర్ గా నటించి అభినందనలు అందుకుంటున్నారు. ఆ రోల్ కి నో చెప్పకుండా రామ్ చరణ్ నటించి ఉంటే తమిళనాడులో అభిమానులు పెరిగిపోయేవారని.. ఇక్కడ కూడా నవాబ్ బ్లాక్ బస్టర్ హిట్ సాధించేదని మెగా అభిమానులు భావిస్తున్నారు. ఇలాంటి రోల్స్ ని మిస్ చేసుకోవద్దని చెర్రీకి సూచిస్తున్నారు.
