మెగా హీరోల సినిమాలు వరుసగా రిలీజ్ అవుతుంటే అభిమానులకు పండుగే పండుగ. అయితే ఆ కుటుంబ సభ్యులకు మాత్రం కొంత ఇబ్బందిగానే ఉంటుంది. ఎందుకంటే ఒక హీరో గురించి చెప్పినా మరో హీరో బాధపడతాడు. అందుకే రామ్ చరణ్ దంపతులు ఇద్దరికీ విషెష్ చెప్పి ఎవరికీ కోపం రాకుండా చేశారు. మెగా హీరో సాయిధరమ్ తేజ్ కొంతకాలంగా హిట్ కోసం ఎదురుచూస్తున్నారు. వి వి వినాయక్ దర్శకత్వం లో చేసిన ఇంటిలిజెంట్ సినిమాపై ఆశలు పెట్టుకున్నారు. ప్రముఖ నిర్మాత సి.కళ్యాణ్‌ నిర్మించిన ఈ మూవీ ఫిబ్రవరి 9 న విడుదల చేస్తున్నారు. ఇక వెంకీ అట్లూరి దర్శకత్వంలో వరుణ్ తేజ్ చేసిన “తొలి ప్రేమ” సినిమా చేశారు. శ్రీ వెంకటేశ్వర సినీ చిత్ర బ్యానర్లో బీవీఎస్ఎన్ ప్రసాద్ నిర్మిస్తున్న ఈ చిత్రం ఫిబ్రవరి 10న రిలీజ్ కానుంది.
ఈ రెండు సినిమాలకు చెందిన టీజర్, ట్రైలర్ కొన్ని గంటల తేడాలో రిలీజ్ అయ్యాయి. దీనిపై చరణ్ దంపతులు స్పందించారు. వరుణ్ తేజ్ పోస్ట్ చేసిన తొలిప్రేమ ట్రైలర్ పై ఉపాసన స్పందిస్తూ.. “వరుణ్ తేజ్ ఈజ్ సో స్వీట్.. చూస్తుంటే సినిమాను ప్రతి గర్ల్ డిఫెరెంట్ గా ఎంజాయ్ చేస్తుందేమో అని అనిపిస్తోంది. గుడ్ లక్” అని ట్వీట్ చేసింది. చరణ్ మాత్రం పేస్ బుక్ ద్వారా సాయి ధరమ్ తేజ్ ఇంటెలిజెంట్ టీజర్ పై స్పందించారు. “ప్రతి ఫ్రేమ్ లో వివి.వినాయక్ గారి మ్యాజిక్ చూడవచ్చు. తప్పకుండా సాయి కెరీర్ లో గుర్తుండిపోయే సినిమా అవుతుంది. టీమ్ అందరికి ఆల్ ది బెస్ట్” అని రామ్ చరణ్ తేజ్ కామెంట్ చేశారు.
