‘రంగేళి’ చిత్రంతో ఇండియా వైడ్ క్రేజ్ సంపాదించుకుంది ఉర్మిళా మటోండ్కర్. అంతేకాదు ‘అంతం’ ‘గాయం’ ‘అనగనగా ఒక రోజు’ వంటి తెలుగు చిత్రాలలో కూడా హీరోయిన్ గా నటించింది ఉర్మిళా మటోండ్కర్. త్వరలొనే ఈ బాలీవుడ్ భామ రాజకీయ రంగ ప్రవేశం చేయబోతుందట. కాంగ్రెస్ పార్టీ తరపున నార్త్ ముంబై నుండీ ఎంపీగా పోటీ చేయబోతుందని తాజా సమాచారం.
ఇప్పటివరకూ తన నటన తోనూ, గ్లామర్ తోనూ ప్రేక్షకుల్ని ఎంతగానో ఆకట్టుకున్న ఊర్మిళ ఇప్పుడు ప్రజాసేవకు కూడా సిద్ధమయిందన్న మాట. అతిత్వరలో ఈమె ఏఐసీసీ రాహుల్‌గాంధీతో భేటీ అవ్వబోతుందని, అప్పుడు దీని పై స్పష్టత వస్తుందంటూ పార్టీ వర్గాల వారు చెబుతున్నారు. 2014లో ఇక్కడ నుండీ పోటీ చేసిన కాంగ్రెస్ అభ్యర్థి సంజయ్ నిరుపమ్ ముంబై వాయువ్య స్థానానికి మారిన సంగతి తెలిసిందే. ఈ నేపధ్యలో నార్త్ నియోజకవర్గంలో ఊర్మిళను ఎన్నికల బరిలో దించాలని కాంగ్రెస్ ప్లాన్ చేస్తుందట. గతంలో బాలీవుడ్ దిగ్గజమయిన సునీల్‌దత్ ఇదే స్థానం నుండీ ఐదుసార్లు గెలుపొందారు. దీంతో ఊర్మిళ కూడా కచ్చితంగా విజయం సాదిస్తుందని వారు ధీమాగా ఉన్నట్టు తెలుస్తుంది.
