కన్నడ బ్యూటీ రష్మిక అందం, అదృష్టం, అభినయ సామర్ధ్యం పుష్కలంగా ఉన్న కథానాయికల్లో ఒకరు. అందుకే ఆమె కోసం ఆఫర్లు క్యూ కడుతున్నాయి. ఆల్రెడీ తెలుగులో విజయ్ దేవరకొండ సరసన “డియర్ కామ్రేడ్” చిత్రంలో నటిస్తున్న రష్మిక కన్నడలో రెండు సినిమాలతో యమ బిజీగా ఉంది. ఇప్పుడు ఈమెకు అదృష్టం డోర్ బెల్ కొట్టింది. అది కూడా అలాంటిలాంటి ఆఫర్ కాదు.. మెగా ఫ్యామిలీలో మోస్ట్ సక్సెస్ ఫుల్ యంగ్ హీరో అయిన వరుణ్ తేజ్ సరసన నటించే అవకాశం సొంతం చేసుకొందని సమాచారం. తమిళ సూపర్ హిట్ చిత్రం “జీగార్తాండ”ను హరీష్ శంకర్ రీమేక్ చేయనున్న విషయం తెలిసిందే.
ఈ చిత్రంలో తమిళనాట లక్ష్మీ మీనన్ పోషించిన పాత్రను రష్మిక చేయనుందని తెలుస్తోంది. వరుణ్ తేజ్ డైరెక్టర్ గా నటించనున్న ఈ చిత్రంలో గ్యాంగ్ స్టర్ పాత్రలో ఎవరు కనిపిస్తారనేది ఇంకా తెలియరాలేదు. తొలుత ఈ చిత్రంలో వరుణ్ గ్యాంగ్ స్టర్ రోల్ పోషించనున్నాడు అని వార్తలొచ్చినప్పటికీ.. సిద్ధార్థ్ పాత్రను రిప్రైజ్ చేస్తున్నాడని కన్ఫర్మ్ అయ్యింది. ఈ ఆఫర్ గనుక రష్మికకు కన్ఫర్మ్ అయ్యిందంటే.. మెగా కాంపౌండ్ లో ఆల్రెడీ అడుగుపెట్టిన ఈ సుందరి అక్కడ సుస్థిర స్థానాన్ని సొంతం చేసుకోవడం ఖాయం. ఇక అప్పుడు రష్మికకు కథానాయికగా ఇప్పుడప్పుడే వెనక్కి తిరిగి చూడాల్సిన అవసరం రాదు.
