తాము ఎప్పుడూ కలిసి ఉంటాము, మా మధ్య ఎటువంటి ద్వేషాలు లేవని హీరోలు ఎన్నిసార్లు చెబుతున్నా, అభిమానులు మారడం లేదు. ఒక హీరో పై, మరో హీరో అభిమాని విమర్శించడం ఈ మధ్య ఎక్కువైంది. సోషల్ మీడియాలో నేరుగా విమర్శిస్తున్నారు. ఆ నటుడినే కాకుండా, అతని కుటుంబ సభ్యులను సైతం అసభ్య పదాలతో తిడుతున్నారు. ఈ సెగ పవర్‌ స్టార్‌ పవన్ కళ్యాణ్ మాజీ భార్య రేణు దేశాయ్‌ కు తగిలింది. యాంటీ పవన్ ఫ్యాన్స్ తనపై చేస్తున్న కామెంట్లకు ఆమె హర్ట్ అయ్యారు.
వాటిని అడ్డుకట్ట వేయాలని ఓ ఇంటర్వ్యూ లో పోకిరీలకు క్లాస్ పీకారు. “తెలుగు హీరోలందరూ చాలా మంచి సంబంధాలు కలిగి ఉంటారు. నేను పవన్, కలిసి ఉన్నప్పుడు మాఇంటికి వెంకటేష్ తరచుగా వచ్చేవారు. అలాగే అప్పట్లో పైరసీకి సంబంధించి మహేష్‌ బాబు పోరాడినప్పుడు అతనికి పవన్ అండగా నిలిచారు. హీరోలందరూ స్నేహంగానే ఉన్నా అభిమానులు మాత్రం అవతలి హీరోల మీద ఇలా ఎందుకు దుష్ప్రచారం చేస్తారో.. వారి కుటుంబ సభ్యుల మీద సోషల్ మీడియాలో ఎందుకు దాడి చేస్తారో అర్థం కాదు” అని రేణు వెల్లడించారు. “మీకు జాబ్ రాలేదని, లవ్ లో ఫెయిల్ అయ్యారని .. ఆ ఫ్రస్టేషన్ అంతా మీరు అభిమానించని హీరోపై, వారి కుటుంబ సభ్యులపై చూపించడం మంచి పద్ధతి కాదని ఆమె మొట్టికాయ వేశారు.
