“ఏ మాయ చేశావే”, “ఆటో నగర్ సూర్య”, “మనం ” సినిమాలతో నాగచైతన్య, సమంత జంట హిట్ పెయిర్ గా పేరుతెచ్చుకుంది. ఇప్పుడు మరో మారు తెరపై కలిసి కనిపించనున్నారు. “నిన్నుకోరి” హిట్ తో మంచి పేరు తెచ్చుకున్న శివ నిర్వాణ దర్శకత్వంలో నటించనున్నారు. హరీశ్ పెద్ది, సాహు గారపాటి కలిసి నిర్మిస్తోన్న ఈ సినిమా కోసం ఉమ్మడిగా ఏడుకోట్ల రెమ్యునరేషన్ అందుకున్నట్టు సమాచారం. మరో విశేషం ఏమిటంటే ఇందులో భార్య భర్తలుగానే కనిపించనున్నారు. తొలి సన్నివేశంలోనే పెళ్లి అయిపోతుందని చైతు స్పష్టం చేశారు. అయితే సినిమాలో పెళ్లి తర్వాత వీరి మధ్యలోకి ఓ అమ్మాయి వస్తుందని.. ఆమె వల్ల ఇద్దరు ఇబ్బందులు పడుతున్నారని సమాచారం. ఆ పాత్రను హిందీ నటి దివ్యంశ కౌశిక్ పోషించబోతున్నట్టు తెలిసింది.
తొలి షెడ్యూల్ ఈనెల చివరి వారంలో హైదరాబాద్ లో ప్రారంభంకానుంది. ఈ షెడ్యూల్లో సమంత, చైతూతో పాటు రావు రమేష్, అవసరాల శ్రీనివాస్ తదితరులు పాల్గొననున్నారు. పక్కాగా ప్రీ ప్రొడక్షన్ వర్క్ జరుపుకుంటోన్న ఈ సినిమాకి తాజాగా టైటిల్ ని ఫిక్స్ చేసినట్లు తెలిసింది. చిత్ర బృందం “మజిలి” అనే పేరుని రిజిస్టర్ చేసినట్లు ఫిలిం నగర్ వాసులు చెప్పారు. ఇందులో ఎంతవరకు నిజముందో త్వరలోనే తెలియనుంది. గోపి సుందర్ సంగీతమందిస్తున్న ఈ చిత్రం యువతీ యువకులతో పాటు, ఫ్యామిలీ ఆడియన్స్ మెప్పు అందుకుంటుందని చిత్ర బృందం ఆశిస్తోంది.
