సమంత హీరోయిన్ గా పరిచయమైంది ‘ఏం మాయ చేసావే’ అనే సినిమాతోనే అనుకొంటుంటారు జనాలు. కానీ సామ్ అంతకుముందు తమిళంలో హీరోయిన్ గా ఒక సినిమాలో నటించిందనే విషయం చాలా తక్కువమందికి తెలుసు. ఇక ఆ సినిమాలో హీరో రాహుల్ రవీంద్రన్ అనే విషయం అయితే సమంత వీరాభిమానులకు కూడా సరిగా తెలియదు. అయితే.. మళ్ళీ దాదాపు 10 ఏళ్ల తర్వాత సమంత తన తొలి సినిమా కథానాయకుడైన రాహుల్ రవీంద్రన్ తో కలిసి నటించనుంది. అది కూడా తానెంతో ఇష్టపడి కథానాయికగా నటించనున్న చిత్రంలో.
రెండేళ్ల క్రితం కన్నడలో విడుదలైన “యూ టర్న్” సినిమా చూసి ఆ సినిమాను తెలుగు-తమిళ భాషల్లో రీమేక్ చేయాలనుకొన్న సమంత తొలుత ఆ చిత్రాన్ని తానే స్వయంగా రీమేక్ చేయాలనుకొంది. కానీ.. కథానాయిక ప్రాధాన్యమున్న సినిమా కావడం, రెండు భాషల్లోనూ ఏకకాలంలో షూట్ చేయాల్సి ఉండడంతో నిర్మాణ బాధ్యతలను వేరే వాళ్ళకి అప్పగించి తాను కథానాయికగా నటించేందుకు సిద్ధమైంది. తాజా సమాచారం ప్రకారం ఈ చిత్రంలో సమంత లవర్ గా రాహుల్ రవీంద్రన్ నటించనున్నాడని తెలుస్తోంది. ఇద్దరి నడుమ లవ్ ఎపిసోడ్స్ ఏమీ ఉండకపోయినప్పటికీ కాంబినేషన్స్ సీన్స్ బాగుంటాయి. కథానాయిక ప్రాధాన్యమున్న సినిమా కావడంతో ఎలాగూ స్టార్ హీరోలు ఈ సినిమాలో నటించరు. అందువల్ల తెలుగుతోపాటు తమిళం కూడా తెలిసిన రెండు భాషల్లోనూ గుర్తింపు ఉన్న రాహుల్ రవీంద్రన్ అయితేనే ఈ పాత్రకు న్యాయం చేయగలడని భావించి సమంత ఈ నిర్ణయం తీసుకొంది.
