యువ హీరో విజయ్ దేవరకొండ పెళ్లి చూపులు, అర్జున్ రెడ్డి సినిమాలతో స్టార్ హీరో అయిపోయారు. చేతినిండా సినిమాల్తో బిజీగా ఉన్నారు. నూతన దర్శకుడు రాహుల్ సాంకృత్యాన్ తో టాక్సీవాలా అనే థ్రిల్లర్ చేస్తున్నారు. ప్రస్తుతం విజయ్ చేస్తున్న ఐదు సినిమాల్లో ముందు థియేటర్లోకి వస్తున్న చిత్రమిదే. ఇక ఏకకాలంలో తెలుగు, తమిళ భాషల్లో నోటా అనే మూవీ చేస్తున్నారు. ఆనంద్ శంకర్ దర్శకత్వంలో తెరకెక్కుతోన్న ఈ సినిమా వేగంగా షూటింగ్ జరుపుకుంటోంది. ఇందులో హీరోయిన్ గా మెహరీన్ నటిస్తున్న సంగతి తెలిసిందే.
తాజాగా ఈ చిత్ర బృందంలోకి చెన్నై మోడల్ సంచనా నటరాజన్ జాయిన్ అయింది. ఈమెకి మోడలింగ్ రంగంలో మంచి పేరుంది. అలాగే “I Am Suffering From Kadhal ” అనే షార్ట్ ఫిలిం ద్వారా ఎక్కువమంది అభినందనలు అందుకుంది. అందులో సంచనా నటన మెచ్చి ఆమెకు హీరోయిన్ తో సమానమైన పాత్రను డైరక్టర్ అందించినట్టు సమాచారం. విజయ్ తో స్క్రీన్ షేర్ చేసుకుంటున్నందుకు సంచనా చాలా ఆనందంగా ఉంది. ఇక విజయ్ దేవరకొండ జర్నలిస్ట్ గా నటించిన మహానటి వచ్చేనెల 9 న రిలీజ్ కానుంది. అభినేత్రి సావిత్రి జీవితం ఆధారంగా తెరకెక్కిన ఈ మూవీపై భారీ అంచనాలున్నాయి.
