తెలుగు చిత్ర కథల బారికేడ్లను బద్దలకొట్టిన మూవీ అర్జున్ రెడ్డి. సందీప్ వంగా దర్శకత్వంలో తెరకెక్కిన ఈ సినిమా కలక్షన్ల రికార్డులను కొల్లగొట్టింది. తెలుగు రాష్ట్రాల ప్రజలకి మాత్రమే కాదు.. పొరుగురాష్ట్రాల సినీ అభిమానులకు సైతం బాగా నచ్చింది. విజయ్ దేవరకొండ పోషించిన అర్జున్ రెడ్డి పాత్రలో నటించడానికి స్టార్ హీరోలు ఆసక్తికనబరుస్తున్నారు. తమిళంలో విక్రమ్ తనయుడు అర్జున్ రెడ్డి గా నటిస్తుండగా.. బాలీవుడ్ లో షాహిద్ కపూర్ అర్జున్ రెడ్డి అవతారం ఎత్తబోతున్నారు. హిదీ రీమేక్ కి సందీప్ వంగా దర్శకత్వం వహిస్తున్నారు. ప్రీ ప్రొడక్షన్ వర్క్ జోరుగా జరుపుకుంటున్న ఈ సినిమాపై డైరక్టర్ తాజాగా స్పందించారు. “కొత్త కథని డైరక్ట్ చేయడానికి వెళుతున్నప్పుడు ఉండే ఆత్రుత అర్జున్ రెడ్డి రీమేక్ విషయంలో ఉంది. నా స్క్రిప్ట్ ని నేనే మెరుగులు దిద్దడం కొత్తగా ఉంది.
తెలుగు అబ్బాయి తులు అమ్మాయిని ప్రేమించడం అనే లైన్ తో అర్జున్ రెడ్డి ఉంది. ఇప్పుడు ఆ ప్లాట్ మారింది. ఇప్పుడు ఇండియాలోని మరో రెండు సంప్రదాయాలను వెండితెరపై చూపించబోతున్నాను. హిందీలోను ఈ కథ మ్యాజిక్ చేస్తుంది” అని నమ్మకంగా చెప్పారు. “ఈ కథ నిజ జీవితానికి దగ్గరగా ఉంటుంది. అందుకే ప్రతి ప్రేక్షకుడు కనెక్ట్ అవుతారు. ఇక స్క్రిప్ట్ కుర్చీల్లోంచి కదలకుండా చేస్తుంది. షాహిద్ కపూర్ నటన మరింత ఆకర్షణగా నిలువనుంది” అని సందీప్ వంగా తెలిపారు. ఒక్క సినిమాతోనే బాలీవుడ్ అవకాశం అందుకున్న తెలుగు డైరక్టర్.. ఈ చిత్రాన్ని వచ్చే నెల నుంచి సెట్స్ పైకి తీసుకు వెళ్లనున్నారు.
