పాన్ ఇండియా స్టార్ ప్రభాస్ అభిమానులు ‘స్పిరిట్'(Spirit) సినిమాపై చాలా హోప్స్ పెట్టుకున్నారు. ఎందుకంటే ‘సలార్’ ‘కల్కి 2898 AD’ వంటి 2 సూపర్ హిట్ సినిమాల తర్వాత ఈ ఏడాది సంక్రాంతి కానుకగా వచ్చిన ‘ది రాజాసాబ్’ సినిమా పెద్ద డిజాస్టర్ అయ్యింది. అందుకే ‘స్పిరిట్’ తో స్ట్రాంగ్ కంబ్యాక్ ఇవ్వాలని ప్రభాస్ అభిమానులు ఆశిస్తున్నారు. ప్రభాస్ కూడా అదే లక్ష్యంతో కష్టపడుతున్నాడు. సందీప్ రెడ్డి వంగా దర్శకత్వంలో తెరకెక్కుతున్న సినిమా ఇది.
శరవేగంగా షూటింగ్ జరుపుకుంటుంది. 2027 మార్చి 5న విడుదల కాబోతున్నట్టు ఆల్రెడీ సందీప్ ప్రకటించాడు. ఇప్పటికే 40 శాతం చిత్రీకరణ పూర్తైనట్టు వినికిడి. సాధారణంగా వేరే పెద్ద సినిమాలు ఈ మాత్రం షూటింగ్ కంప్లీట్ చేసుకుంటే.. గ్లింప్స్, టీజర్ వంటివి వదులుతుంటారు. కానీ సందీప్ రెడ్డి వంగా అలాంటి ఆలోచనలు పెట్టుకోవడం లేదు. ఆకేషనల్..గా మాత్రమే ప్రమోషన్స్ చేయాలని డిసైడ్ అయ్యాడు.
అలా అని ఫ్యాన్స్ ని ఇబ్బంది పెట్టడం లేదు. అప్పుడప్పుడు షూటింగ్ ఆన్ లొకేషన్ ఫిక్స్ కొన్ని వదులుతూనే ఉన్నాడు. ఈ మధ్యనే కూకట్పల్లి పరిసర ప్రాంతాల్లో ‘స్పిరిట్’ షూటింగ్ ను నిర్వహించారు. ఇప్పుడు చంచల్గూడలో నెక్స్ట్ షెడ్యూల్ నిర్వహిస్తున్నట్టు తెలుస్తోంది. అందుతున్న సమాచారం ప్రకారం..చంచల్గూడ జైలు పరిసరాల్లో ‘స్పిరిట్’కి సంబంధించిన హై-వోల్టేజ్ యాక్షన్ బ్లాక్స్ ని చిత్రీకరిస్తున్నారట.
దీనికి సంబంధించిన షాడో పిక్ ఒకటి సందీప్ రెడ్డి వంగా తన సోషల్ మీడియా హ్యాండిల్లో షేర్ చేసుకున్నాడు. ఈ షాడో పిక్ ను గమనిస్తే.. హీరో ప్రభాస్ క్యాప్ పెట్టుకుని రగ్డ్ గా కనిపిస్తున్నాడు. సందీప్ రెడ్డి వంగాతో ఏదో నవ్వుకుంటూ డిస్కస్ చేస్తున్నట్టు కనిపిస్తుంది.సందీప్ పెట్టిన ఈ పోస్ట్ కొద్దిసేపటికే ట్రెండింగ్లోకి వెళ్లిపోయింది. ‘సింప్లీ ఒన్ లయన్ ఆరా’ అంటూ ప్రభాస్ అభిమానులు ఈ ఫోటోకి కామెంట్లు పెడుతున్నారు.
