కమర్షియల్ సినిమా విజయానికి.. ఐటెం సాంగ్ కి విడదీయరాని అనుబంధం ఉంది. స్టార్ హీరో మాస్ మసాలా మూవీలో స్పెషల్ సాంగ్ ఇప్పుడు కామన్ అయిపోయింది. అయితే అఖిల్ మొదటి సినిమా అఖిల్ లోను, రెండో సినిమా హలో లోను ఈ ప్రత్యేక పాట మిస్సయింది. ఈ సారి తన చిత్ర ప్రేక్షకులకు ఐటెం సాంగ్ లోటు ఉండకూడదని అఖిల్ ఫిక్స్ అయ్యారు. అందుకే అదిరే ఐటెం సాంగ్ ఉండేలా ప్లాన్ చేశారు. ప్రస్తుతం వెంకీ అట్లూరి దర్శకత్వంలో ఒక సినిమా చేస్తున్నారు. నిధి అగర్వాల్ హీరోయిన్ గా నటిస్తున్న ఈ మూవీ విదేశాల్లో చిత్రీకరణ జరుపుకుంటోంది. ఈ భారీ షెడ్యూల్ ల్లో కీలక భాగం పూర్తి చేయనున్నారు.
తొలిప్రేమ వంటి విజయం తర్వాత వెంకీ అట్లూరి చేస్తున్న ఈ చిత్రానికి “మిస్టర్ మజ్ను” అనే టైటిల్ ను పరిశీలిస్తున్నారు. అలాగే ఐటెం సాంగ్ పెట్టడానికి వెంకీ అట్లూరి సిద్ధమయ్యారు. ఆ స్పెషల్ సాంగ్ లో అందాలు ఆరబోసే బ్యూటీని కూడా ఖరారు చేసినట్లు తెలిసింది. మెగా హీరో సాయిధరమ్ తేజ్ “తిక్క”, నటసింహ బాలకృష్ణ “గౌతమీ పుత్ర శాతకర్ణ” సినిమాలలో ఐటమ్ సాంగ్స్ తో ఫరా కరిమి హీట్ పుట్టించింది. ఆమె అఖిల్ చిత్రంలోను స్టెప్పులు వేయనుంది. బీవీఎన్ ప్రసాద్ నిర్మిస్తున్న ఈ చిత్రానికి ఎస్ ఎస్ థమన్ సంగీతాన్ని సమకూర్చుతున్నారు. ఇప్పటికే ఐటెం సాంగ్ కంపోజ్ చేసినట్లు సమాచారం. పాట రెడీ.. భామ రెడీ ఇక షూటింగే మిగిలి ఉంది.
