బాహుబలి తర్వాత ప్రభాస్ చేస్తున్న సాహో సినిమా షూటింగ్ వేగంగా సాగుతోంది. యువ దర్శకుడు సుజీత్ దర్శకత్వంలో తెరకెక్కుతోన్న ఈ మూవీలో బాలీవుడ్ బ్యూటీ శ్రద్ధ కపూర్ హీరోయిన్ గా నటిస్తోంది. హైదరాబాద్ లోని అమీర్ పేటలో వేసిన ఓ ఇంటి సెట్ సెట్ లో జరిగిన చిత్రీకరణలో శ్రద్ధ పాల్గొంది. షూటింగ్ కి హాజరైన తొలిరోజు ఆమెకు ప్రభాస్ 18 రకాల తెలుగు వంటకాలను వడ్డించి ఆనందింపజేయించారు. శ్రద్ధా కూడా తక్కువ తినలేదు. ప్రభాస్ ని కూడా షాక్ కి గురిచేసినట్లు సమాచారం. ప్రభాస్ నటించిన బాహుబలి చిత్రాలను మాత్రమే కాకుండా ఈశ్వర్ నుంచి మొత్తం 18 చిత్రాలను చూసి, అందులో ప్రభాస్ నటన ఎలా ఉందో ఆమె వివరించి చెబుతుంటే ఆశ్చర్యపోవడం ప్రభాస్ వంతయింది.
అంతేకాదు సాహో లో తెలుగు డైలాగులను చక్కగా పలకడానికి ప్రత్యేకంగా తెలుగు మాస్టర్ ని నియమించుకున్న విషయం తెలిసి ప్రభాస్ శ్రద్ధాని అభినందించక ఉండలేకపోయారు. ఆమె డెడికేషన్ కి ప్రశంసించినట్లు చిత్ర బృందం వెల్లడించింది. యూవీ క్రియేషన్స్‌ బ్యానర్లో వంశీ, ప్రమోద్ లు భారీ బడ్జెట్ తో ఏకకాలంలో తెలుగు, తమిళం, హిందీ భాషల్లో నిర్మిస్తున్న ఈ సినిమాలో నీల్‌ నితిన్‌ ముఖేష్‌, చుంకీ పాండే, జాకీ ష్రాఫ్‌ తదితరులు నటిస్తున్నారు. వచ్చే ఏడాది థియేటర్లోకి రానున్న ఈ చిత్రంపై భారీ అంచనాలున్నాయి.
