టాలీవుడ్ ఇండస్ట్రీలో లవర్ బాయ్ గా ఒక వెలుగు వెలిగిన హీరోలలో సిద్దార్థ్ ఒకరు. నువ్వొస్తానంటే నేనొద్దంటానా, బొమ్మరిల్లు సినిమాలతో పాపులర్ అయిన సిద్దార్థ్ తర్వాత కాలంలో తెలుగులో వరుస విజయాలను సాధించలేకపోయారు. తమిళంలో పరవాలేదనే స్థాయిలో మార్కెట్ ఉన్న సిద్దార్థ్ తన పెళ్లి ద్వారా వార్తల్లో నిలిచారు. సిద్దార్థ్, అదితిరావు హైదరి డేటింగ్ లో ఉన్నట్టు గత కొంతకాలంగా వార్తలు ప్రచారంలోకి వచ్చాయి.
అయితే ఎట్టకేలకు సిద్దార్థ్, అదితి పెళ్లి చేసుకున్నారని తెలుస్తోంది. వనపర్తిలోని శ్రీరంగపురం టెంపుల్‌లో సిద్దార్థ్, అదితి వివాహం జరిగిందని భోగట్టా. ఈ పెళ్లి వేడుకకు కుటుంబ సభ్యులు, సన్నిహితులు మాత్రమే హాజరైనట్టు తెలుస్తోంది. అయితే పెళ్లికి సంబంధించిన ఫోటోలను మాత్రం సిద్దార్థ్, అదితి రిలీజ్ చేయలేదు. త్వరలో సిద్దార్థ్ తన పెళ్లికి సంబంధించి పూర్తిస్థాయిలో క్లారిటీ ఇస్తారేమో చూడాలి.
సిద్దార్థ్ కు ఇది మూడో పెళ్లి కాగా అదితికి రెండో పెళ్లి అని సమాచారం అందుతోంది. సిద్దార్థ్, అదితి పెళ్లి తర్వాత అన్యోన్యంగా ఉండాలని నెటిజన్లు కామెంట్లు చేస్తున్నారు. వనపర్తి సంస్థానాధీశుల వారసులలో అదితిరావు హైదరీ ఒకరని సమాచారం అందుతోంది. అందువల్లే సిద్దార్థ్, అదితీరావు హైదరీ ఇక్కడ పెళ్లి చేసుకున్నట్టు తెలుస్తోంది. మహా సముద్రం సినిమా సమయంలో సిద్దార్థ్, అదితి ప్రేమలో పడి ఎట్టకేలకు పెళ్లి బంధంతో ఒక్కటయ్యారు.
ఆ సినిమా బాక్సాఫీస్ వద్ద ఆశించిన స్థాయిలో సక్సెస్ కాకపోయినా సిద్దార్థ్, అదితి జోడీకి మాత్రం ఫ్యాన్స్ ఉన్నారు. సిద్దార్థ్, అదితి ఈ పెళ్లి వార్తలకు సంబంధించి ఎలాంటి ప్రకటన చేయలేదు. సిద్దార్థ్, అదితి జోడీ చూడముచ్చటగా ఉందని నెటిజన్లు సోషల్ మీడియా వేదికగా కామెంట్లు చేస్తుండటం గమనార్హం. సిద్దార్థ్ ప్రేమ, పెళ్లికి సంబంధించి అనేక వివాదాల ద్వారా వార్తల్లో నిలిచారు. తెలుగులో ఒక స్టార్ హీరోయిన్ తో సిద్దార్థ్ నడిపిన ప్రేమాయణం గురించి ప్రత్యేకంగా చెప్పాల్సిన అవసరం లేదు.
