టాలీవుడ్ సింగర్స్ లో మనో ఎంత సరదాగా ఉంటారో తెలిసిందే. ఆయన ఏ షోలో కనిపించినా.. తన పాటలతో పాటు జోకులు వేస్తూ నవ్విస్తుంటారు. పాటలు పాడే సమయంలో తన అభినయంతో ప్రేక్షకులను మరింత ఎంటర్టైన్ చేస్తుంటారు. అలాంటి సింగర్ స్టేజ్ పై పాట పాడుతూ సడెన్ గా వెక్కి వెక్కి ఏడవడం ఇప్పుడు హాట్ టాపిక్ గా మారింది. వివరాల్లోకి వెళితే.. ఓ ఛానెల్ వారు విజయదశమి వేడుకల్లో భాగంగా స్పెషల్ ప్రోగ్రాంని ప్రసారం చేయాలనుకున్నారు.
ఈ షో ప్రమోషన్స్ లో భాగంగా రకరకాల ప్రోమోలను విడుదల చేస్తున్నారు. తాజాగా విడుదల చేసిన ప్రోమోలో సింగర్ మనో ఎమోషనల్ అవుతూ కనిపించారు. ఈ వీడియో సోషల్ మీడియాలో వైరల్ అవుతోంది. ఇటీవల అనారోగ్యంతో మరణించిన గానగంధర్వుడు ఎస్పీ బాలుకి నివాళులు అర్పిస్తూ మనో.. సింగర్ ఉషతో కలిసి ‘సూర్యుడే సెలవని’ అనే పాటను ఆలపించారు. ఈ పాట పాడుతున్న సమయంలో ఆయన ఒక్కసారిగా తీవ్ర భావోద్వేగానికి గురయ్యారు. స్టేజ్ పైనే కన్నీళ్లు పెట్టుకున్నారు.
దీంతో అక్కడున్న వారంతా కూడా ఎమోషనల్ అయ్యారు. మనోని ఎంతగా ఓదార్చడానికి ప్రయత్నించినా.. ఆయన చిన్నపిల్లాడి ఏడవడం చూసిన అక్కడున్న వారి కళ్లు చెమర్చాయి. ఆ తరువాత తేరుకొని ఎస్పీ బాలుతో ఉన్న తన బంధం గురించి మాట్లాడారు. బాలు గారిని చూస్తూ పెరిగానని.. అందరినీ సమానంగా చూసే గొప్ప వ్యక్తిత్వం ఉన్న మనిషి అంటూ చెప్పుకొచ్చారు. అలాంటి వ్యక్తి ఈరోజు లేకపోవడంతో తట్టులేకపోతున్నానంటూ ఆవేదన చెందారు. ఎస్పీ బాలు, మనో కలిసి ఎన్నో పాటలు పాడారు. అలానే స్టేజ్ షోలలో కూడా కనిపించారు.
