“ఇంట గెలిచి రచ్చగెలవాలి” అనే నానుడి మన తెలుగమ్మాయిలకు ఎప్పుడూ అచ్చిరాలేదు. అందుకే ముందు రచ్చ (ఇతర భాషా చిత్రాలు) గెలిచి ఆ తర్వాత ఇంట (తెలుగు చిత్రాలు) గెలవడానికి ప్రయత్నిస్తున్నారు. అంజలి, శ్రీదివ్యాలు ఇప్పటికే ఈ జాబితాలో స్థానం సంపాదించుకోగా.. తాజాగా ఈ జాబితాలో చేరుతున్న నటి శోభిత దూళిపాళ. అంతర్జాతీయ స్థాయిలో గుర్తింపున్న ఈ అమ్మడికి తెలుగులో అవకాశాలు రాకపోవడంతో.. బాలీవుడ్ లో “రమణ్ రాఘవ్ 2.0″తో కథానాయికగా పరిచయమైంది. ఇప్పుడీ తెనాలి పాప బాలీవుడ్ లో వరుస అవకాశాలు దక్కించుకొంటూ హల్ చల్ చేస్తోంది.
ఇప్పటికే ప్రముఖ బాలీవుడ్ నిర్మాణ సంస్థ “ఫాంటమ్ ఫీలింస్”తో వరుసగా మూడు చిత్రాల్లో నటించేందుకు అగ్రిమెంట్ కుదుర్చుకొన్న శోభిత, ఇప్పుడు మరో బాలీవుడ్ సినిమా ఆఫర్ ను దక్కించుకొంది. అయితే.. అది డార్క్ కామెడీ చిత్రమాట. సైఫ్ అలీఖాన్ కథానాయకుడిగా నటించనున్న ఈ చిత్రంలో కునాల్ కపూర్ కు జంటగా శోభిత నటించనుందని సమాచారం. చూస్తుంటే.. శోభిత బాలీవుడ్ లో పాగా వేసేదాకా పట్టువీడేట్టు లేదు!
