హాస్యనటుడిగా అనేక సినిమాల్లో నటించి, నవ్వించిన సునీల్ హీరోగా మారి విజయాలను అందుకున్నారు. అయితే గత కొంతకాలంగా అతను నటించిన సినిమాలు బాక్స్ ఆఫీస్ వద్ద బోల్తా పడుతున్నాయి. దీంతో హాస్య నటుడిగా రీ ఎంట్రీ ఇవ్వడానికి ప్రయత్నిస్తున్నారు. సునీల్ కి పూర్వ వైభవం తీసుకురావాలని త్రివిక్రమ్ శ్రీనివాస్ భావిస్తున్నారు. అందుకే తాను డైరక్ట్ చేయనున్న ఎన్టీఆర్ మూవీ ఓ మంచి రోల్ ఇచ్చారని ఫిలిం నగర్ వాసులు చెబుతున్నారు. హారిక అండ్ హాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ చిత్రం రీసెంట్ గా పూజా కార్యక్రమాలు జరుపుకుంది.
ప్రీ ప్రొడక్షన్ పనులు వేగంగా సాగుతోన్న ఈ మూవీ మార్చిలో సెట్స్ మీదకు వెళ్లనుంది. ఇందులో ఎన్టీఆర్ కి మిత్రుడిగా సునీల్ కనిపించనున్నట్లు సమాచారం. త్రివిక్రమ్ దర్శకత్వం వహించిన అతడు, ఖలేజా తదితర చిత్రాల్లో సునీల్ హీరో మిత్రుడిగా నటించి మంచి మార్కులు కొట్టేశారు. ఇందులోనూ ఎన్టీఆర్ కి ఫ్రెండ్ గా నటించి అలరించనున్నారన్నమాట. ప్రస్తుతం త్రివిక్రమ్ పవన్ కళ్యాణ్ సినిమాని పూర్తి చేసే పనిలో ఉన్నారు. అను ఇమ్యానుయేల్, కీర్తి సురేష్ హీరోయిన్లుగా నటిస్తున్న ఈ చిత్రం దాదాపు టాకీ పార్ట్ పూర్తి చేసుకుంది. భారీ అంచనాలు నెలకొని ఉన్న ఈ మూవీ సంక్రాంతి కానుకగా జనవరి 10 న థియేటర్లోకి రానుంది.
