ఒకే హీరోయిన్ నటించిన సినిమాలు ఒకేవారంలో రెండు విడుదలవ్వడం చూసి ఉంటాం, ఒక యంగ్ హీరో సినిమాలు వారం గ్యాప్ లో విడుదలవ్వడం చూసుంటామ్. కానీ ఒకేవారం విడుదలవుతున్న మూడు సినిమాలకి సంగీత దర్శకుడు ఒకడే కావడం మాత్రం చాలా రేర్ గా జరుగుతుంది. ఆ రేర్ ఫీట్ ను అందుకోబోతున్నాడు తమన్. సంగీత దర్శకుడిగా సెంచరీకి అతి చేరువలో ఉన్న తమన్ ఈమధ్య స్పీడ్ పెంచాడు. ఈ శుక్రవారం మరియు శనివారం విడుదలవుతున్న “ఇంటిలిజెంట్, గాయత్రి, తొలిప్రేమ” చిత్రాలకు తమన్ సంగీత దర్శకుడు.
“ఇంటిలిజెంట్” మాస్ మసాలా ఎంటర్ టైనర్ కాగా, “గాయత్రి” రివెంజ్ డ్రామా, “తొలిప్రేమ” మెచ్యూర్డ్ లవ్ స్టోరీ.
ఇలా మూడు విభిన్నమైన జోనర్ చిత్రాలకు సంగీతం అందించి, ఆ మూడు సినిమాలు ఒకేరోజు విడుదలవుతుండడంతో సినిమాల రిజల్ట్స్ కోసం విపరీతమైన ఆసక్తితో ఎదురుచూస్తున్నాడు తమన్. ఎందుకంటే సినిమాలు సక్సెస్ అవ్వడంలో కీలకపాత్ర పోషించే బీజీయమ్ విషయంలో ఈ మూడు సినిమాల కోసం స్పెషల్ కేర్ తీసుకొన్నాడట. ఇక “ఇంటిలిజెంట్” సినిమా కోసం “చమక్ చమక్ చమ్”ను రీమిక్స్ చేయడం, “గాయత్రి” సినిమాలో తన ట్యూన్స్ కి మోహన్ బాబు స్టెప్పులు వేయడం, “తొలిప్రేమ” ఆల్బమ్ మ్యూజికల్ బ్లాక్ బస్టర్ గా నిలిచి సినిమా మీద ఎక్స్ పెక్తేషన్స్ పెంచడం అనేది తమన్ కు అమితానందాన్ని కలిగిస్తోంది.
