‘ఇస్మార్ట్ శంకర్’ సినిమాతో మాస్ ఆడియన్స్ ను అలరించిన రామ్ పోతినేని ఆ తర్వాత ‘రెడ్’ సినిమాతో ప్రేక్షకుల ముందుకు వచ్చాడు. ఈ సినిమా పెద్దగా ఆడకపోవడంతో ఇప్పుడు మరో మాస్ సినిమాతో ఆడియన్స్ ను మెప్పించడానికి రెడీ అవుతున్నారు. తమిళ దర్శకుడు లింగుస్వామి రూపొందిస్తోన్న ‘ది వారియర్’ సినిమాలో నటిస్తున్నాడు రామ్. ఇప్పటికే ఈ సినిమా నుంచి పాటలు, టీజర్ విడుదలయ్యాయి.
తాజాగా సినిమా ట్రైలర్ ను విడుదల చేశారు. ఇందులో రామ్ పవర్ ఫుల్ పోలీస్ ఆఫీసర్ గా కనిపించారు. ట్రైలర్ యాక్షన్ సీన్స్, మాస్ ఎలిమెంట్స్ ఓ రేంజ్ లో ఉన్నాయి. డిప్యూటీ కమీషనర్ ఆఫ్ పోలీస్‌గా కర్నూల్ వెళ్లిన సత్య.. అక్కడ విలన్ గురుతో చేసే పోరాటమే ఈ సినిమా. ఇక ట్రైలర్ లో డైలాగ్స్ ఓ రేంజ్ లో పేలాయి. రొటీన్ గానే ఉన్నప్పటికీ.. విజువల్స్ టెరిఫిక్ గా ఉండడంతో ట్రైలర్ ఆకట్టుకుంది.
విలన్ పాత్రలో ఆది పినిశెట్టి లుక్, పెర్ఫార్మన్స్ మాములుగా లేవు. హీరో, విలన్ ‘నువ్వా నేనా’ అన్నట్లు ఢీ కొట్టే సన్నివేశాలు బాగున్నాయి. మొత్తం ట్రైలర్ కి బ్యాక్ గ్రౌండ్ స్కోర్ హైలైట్ గా నిలిచింది. కృతిశెట్టి హీరోయిన్ గా నటిస్తోన్న ఈ సినిమాలో అక్షరా గౌడ కీలక పాత్రలో కనిపించనుంది. ఈ సినిమాలో రామ్ రెండు గెటప్స్ లో కనిపించనున్నారని సమాచారం. అందులో ఒకటి పోలీస్ రోల్ అని తెలుస్తోంది. రెండో గెటప్ ని మాత్రం ఇంకా రివీల్ చేయలేదు.
జూలై 14న ఈ సినిమా ప్రేక్షకుల ముందుకు రానుంది. తెలుగు, తమిళ భాషల్లో ఈ సినిమా తెరకెక్కుతోంది. దేవిశ్రీప్రసాద్ సంగీతం అందిస్తున్నారు. పవన్ కుమార్ సమర్పణలో శ్రీనివాసా సిల్వర్ స్క్రీన్ పతాకంపై శ్రీనివాసా చిట్టూరి ఈ సినిమాను నిర్మిస్తున్నారు.
