హ్యాపీడేస్ తో తెలుగు చిత్ర సీమలో అడుగు పెట్టిన యువహీరో వరుణ్ సందేశ్ వివాహ ముహూర్తం ఖరారైంది. సూపర్ స్టార్ మహేష్ బాబు, శ్రీకాంత్ మాదిరిగానే తనతో నటించిన హీరోయిన్ నే పెళ్లి చేసుకోబోతున్నాడు. “పడ్డానండి ప్రేమలో మరి” చిత్రంలో వరుణ్ సరసన వితిక హీరోయిన్ గా నటించింది. చిత్రీకరణ సమయంలోనే వీరిద్దరూ ప్రేమలో పడ్డారు. నిజ జీవితంలో కలిసుండాలని నిర్ణయించుకున్నారు. పెద్దలను ఒప్పించి ప్రేమను గెలిపించుకున్నారు.
కుటుంబ సభ్యుల దీవెనలతో వరుణ్, వితికలకు గత ఏడాది నిశ్చితార్ధం అయింది. త్వరలో పెళ్లి పీటలపై కూర్చోనున్నారు. వీరి వివాహ వేడుకకు భాగ్యనగరం వేదిక కానుంది. నగర శివార్లలోని అలంకృత రిసార్ట్ లో ఈ నెల 18న కళ్యాణం జరగనున్నది. ప్రస్తుతం వరుణ్ సందేశ్ తన సన్నిహితులకు పెళ్లి శుభలేఖలను అందించాడు. గత ఆరేళ్లుగా వరుణ్ సందేశ్ 15 చిత్రాల్లో నటించినా ఒకటి కూడా విజయం సాధించలేక పోయింది. మల్టీ స్టారర్ చిత్రాల్లో సైతం నటించాడు. అయినా హిట్ ని అందుకోలేక పోయాడు. వరుణ్ జీవితంలోకి వితిక వస్తేనైనా అతనికి హ్యాపీడేస్ మళ్లీ తిరిగి వస్తుందేమో చూడాలి.
