మూవీ మొఘల్ డి.రామానాయుడు తనయుడిగా చిత్రరంగం లోకి అడుగు పెట్టి, అనేక విజయాలను సొంతం చేసుకొని విక్టరీని ఇంటిపేరుగా మార్చుకున్నారు వెంకటేష్. స్టార్ అనే హోదాను పక్కన పెట్టి కథలో ఒక పాత్రగా కలిసిపోయి అభిమానుల మనసు గెలుచుకున్న వెంకీ గురుగా మనముందుకు రాబోతున్నారు. సుధ కొంగర దర్శకత్వంలో రూపుదిద్దుకున్న ఈ మూవీ మార్చ్ 31 విడుదల కానుంది. ఈ సందర్భంగా అయన మీడియాతో ముచ్చటించారు. సినిమా గురించి అనేక సంగతులు వెల్లడించారు. “దర్శకురాలు సుధ కొంగర గురు సినిమాతో నాలోని ఓ కొత్త నటుడిని నాకు పరిచయం చేశారు. ఈ మూవీ స్క్రిప్టు మొత్తం నా చేతిలో పెట్టి చదవమన్నారు. ఇలా మొత్తం స్క్రిప్టు చదవడమనేది ఇదే తొలిసారి. చదవడమే కాదు… ప్రతి సన్నివేశాన్ని తోటి నటులతో కలిసి ముందుగానే రిహార్సల్స్‌ చేశాను.
దాంతో మరింత సహజమైన నటన బయటికొచ్చింది. సుధ కొంగర స్పష్టతతో చిత్రాన్ని తెరకెక్కించారు. సుధ రూపంలో తెలుగు చిత్ర పరిశ్రమకి ఓ మంచి దర్శకురాలు పరిచయమయ్యారు.” అని వెంకీ వివరించారు. వెంకీ 75 వ సినిమాకి చేరువలో ఉన్నారు. ఆ చిత్రం గురించి అడగగా.. ” నా 75 వ సినిమా కోసం పూరి జగన్నాథ్‌ ఓ స్క్రిప్టుని సిద్ధం చేస్తున్నారు. క్రిష్‌ కూడా ఓ నవల ఆధారంగా సినిమా చేయాలనుకొన్నారు. కానీ అది కార్యరూపం దాల్చలేదు. మరికొన్ని చర్చల దశలో ఉన్నాయి. ఏమి చేసినా.. ఇప్పటివరకు చేసిన దానికంటే మరింత ఉత్తమంగా, విభిన్నంగా చేయాలనే ఆలోచనైతే ఉంది.” అని వెంకటేష్ చెప్పారు.
Also, do SUBSCRIBE to our YouTube channel to get latest Tollywood updates.
