అర్జున్ రెడ్డి సినిమా తర్వాత విజయ్ దేవరకొండ చేసిన గీత గోవిందం సంచలన విజయం సాధించింది. పరుశురాం దర్శకత్వంలో తెరకెక్కిన ఈ సినిమా ఐదు రోజుల్లో 50 కోట్ల మైలు రాయిని దాటి దూసుకుపోతోంది. గీతా ఆర్ట్స్ 2 బ్యానర్ పై బన్నీ వాసు నిర్మించిన ఈ సినిమా తెలుగు రాష్ట్రాల్లోనే కాదు విదేశాల్లోనూ మంచి వసూళ్లను రాబడుతోంది. అతను నటించిన గత చిత్రం అర్జున్ రెడ్డి ఓవర్సీస్ లో వన్ మిలియన్ మార్క్ దాటింది. ఆ మార్క్ ని గీత గోవిందం సులువుగా సాధించింది. అమెరికాలో ప్రీమియర్ షో ల ద్వారా 4 లక్షల డాలర్లు రాబట్టిన గీత గోవిందం ఐదురోజులకు 1.5 మిలియన్ డాలర్లను వసూలు చేసింది.
అమెరికాలోనే కాకుండా ఆస్ట్రేలియాలోను ఈ మూవీ హౌస్ ఫుల్ కలక్షన్స్ రాబడుతోంది. ఈ జోరు చూస్తుంటే 2 మిలియన్ మార్క్ ని త్వరలోనే చేరుకుంటుందని ట్రేడ్ వర్గాలవారు అంచనా వేస్తున్నారు. ఇది ఇలా ఉంటే అర్జున్ రెడ్డి చిత్రంలో కోపంగా కనిపించిన విజయ్ దేవరకొండ.. గీత గోవిందంలో చాలా క్యూట్ గా కనిపించారు. ఇంకేముంది అతనిపై అమ్మాయిలు మనసు పారేసుకుంటున్నారు. అమెరికా అమ్మాయిలయితే విజయ్ దేవరకొండ పోస్టర్స్ పై ముద్దులు కురిపిస్తున్నారని సమాచారం. విజయ్ దేవరకొండ ఫ్లెక్సీకి పాలాభిషేకం చేస్తున్నట్లు తెలిసింది. ఇలా అతనిపై క్రేజ్ రోజురోజుకి పెరిగిపోతోంది.
