“డియర్ కామ్రేడ్”తో తెలుగుతోపాటు తమిళ, మలయాళ, కన్నడ భాషల్లో ఒకేసారి స్టార్ డమ్ సంపాదించాలని విజయ్ వేసిన మాస్టర్ ప్లాన్ పెద్దగా వర్కవుట్ అవ్వలేదు. అయినా కూడా “హీరో” సినిమాతో మరోసారి తెలుగు, తమిళ, మలయాళ, కన్నడ ప్రేక్షకుల్ని ఒకేసారి పలకరించేందుకు సన్నద్ధమవుతున్నాడు దేవరకొండ. అయితే.. ఈ సినిమా ప్రస్తుతం హోల్డ్ లోకి వెళ్లిందని తెలుస్తోంది. దాంతో క్రాంతి మాధవ్ దర్శకత్వంలో తెరకెక్కుతున్న తాజా చిత్రం మరియు అనంతరం పూరీ జగన్నాధ్ దర్శకత్వంలో తెరకెక్కనున్న “ఫైటర్” సినిమాలతో బిజీ అయిపోయాడు విజయ్.
కానీ.. ఈ గ్యాప్ లో బాలీవుడ్ లో కూడా జెండా పాతేందుకు సన్నద్ధమవుతున్నాడని తెలుస్తోంది. ఆల్రెడీ బాలీవుడ్ లో కరణ్ జోహార్ లాంటి క్రేజీ ప్రొడ్యూసర్ తో మంచి రిలేషన్ షిప్ మైంటైన్ చేస్తున్న విజయ్.. అక్కడి దర్శకులు చెబుతున్న కథలు వింటున్నాడట. కథ నచ్చితే సినిమా ప్రొడ్యూస్ చేయడానికి కరణ్ జోహార్ రెడీగా ఉన్నాడు. పూరీ జగన్నాధ్ సినిమా అనంతరం ఈ బాలీవుడ్ చిత్రం ఉండబోతోందని సమాచారం. మరి విజయ్ బాలీవుడ్ ప్రయత్నాలు ఎంతవరకూ వర్కవుట్ అవుతాయో చూడాలి.
