సురేందర్ రెడ్డి దర్శకత్వంలో మెగాస్టార్ చిరంజీవి చేస్తున్న “సైరా నరసింహారెడ్డి” షూటింగ్ వేగంగా సాగుతోంది. హైదరాబాద్ లోని నానక్ రామ్ గూడా స్టూడియోస్ లో వేసిన భారీ సెట్ లో మొదటి షెడ్యూల్ పూర్తి అయిన సంగతి తెలిసిందే. తొలి భారతీయ స్వాతంత్ర సమర యోధుడు రేనాటి సూర్యుడు ఉయ్యాలవాడ నరసింహ రెడ్డి జీవితం ఆధారంగా రూపుదిద్దుకుంటున్న ఈ సినిమా సెకండ్ షెడ్యూల్ నయనతార, అమితాబ్ బచ్చన్, చిరంజీవిలపై సాగింది. ప్లాష్ బ్యాక్ సీక్వెన్స్ తెరకెక్కించారు. కొణిదెల ప్రొడక్షన్ కంపెనీ బ్యానర్లో రామ్‌చరణ్‌ నిర్మిస్తున్న ఈ సినిమా భారీ షెడ్యూల్ రెండు రోజుల క్రితం కంప్లీట్ అయింది.
దీంతో 50 శాతం షూటింగ్ కంప్లీట్ అయినట్లు తెలిసింది. ఈ షెడ్యూల్ లో తమిళ హీరో విజయ్ సేతుపతి కూడా పాల్గొన్నారు. దీంతో అతని పాత్ర ఏమిటనే విషయం పై కోలీవుడ్ పెద్ద చర్చ జరుగుతోంది. ఈ సినిమాలో విజయ్ తమిళ పోరాట యోధుడిగా కనిపిస్తాడని సమాచారం. బ్రిటిష్ వారిపై పోరాటానికి ఉయ్యాలవాడ తెలుగు, తమిళ నాయకులను ఏకం చేస్తాడని.. అప్పుడు తమిళ నాయకుడైన విజయ్ సేతుపతి కలుస్తాడని తెలిసింది. సైరాలో తన పాత్ర అద్భుతంగా ఉంటుందని విజయ్ వెల్లడించారు. దీంతో ఈ సినిమాపై కోలీవుడ్ లోనూ అంచనాలు పెరిగాయి.
