అప్పట్లో చిరంజీవి ఒక షూటింగ్ లో తన కాలికి గాయమైనా పట్టించుకోకుండా షూటింగ్ ఫినిష్ చేసి తమ్ముళ్ళు పవన్ కళ్యాణ్, నాగబాబుల కోసం బొమ్మలు కొనుక్కొని వెళ్ళేవాడట. అందుకే చిరంజీవిని ఆయన అభిమానులు కూడా ప్రేమగా “అన్నయ్య” అని పిలుచుకొంటారు. తమ్ముళ్ళ కెరీర్ లను చక్కదిద్దడం దగ్గర్నుంచి వారిని అనుక్షణం కంటికి రెప్పలా కాపాడుకుంటూ వచ్చాడు చిరంజీవి. అందుకే తమ్ముళ్ళు కూడా అన్నయ్య అంటే ప్రాణం పెడుతుంటారు. ఇప్పటివరకు చిరంజీవి కుటుంబ విషయంలో తన స్వార్ధం ఎప్పుడూ చూసుకోలేదు.. ఇకపై చూసుకోడు కూడా. ఇక ఇప్పుడిప్పుడే తమ్ముడు పవన్ కళ్యాణ్ రాజకీయాల్లో పట్టు సాధిస్తుండడాన్ని గమనిస్తున్న చిరంజీవి నిన్న జరిగిన “జనసేన కవాతు”ను చూసి ఆశ్చర్యపోయాడట. అయితే.. రక్తం పంచుకొని పుట్టిన తమ్ముడ్ని రాజకీయ శత్రువుగా చూడడం ఇష్టం లేక రాజకీయాల నుంచి వైదొలగే అవకాశం ఉందని సమాచారం.
ప్రస్తుతం ‘సైరా నరసింహా రెడ్డి” షూటింగ్ కోసం జార్జియాలో ఉన్న చిరంజీవి.. ఈ సినిమా అయిపోయిన వెంటనే కొరటాల శివ దర్శకత్వంలో సినిమా చేసేందుకు రంగం సిద్ధం చేసుకొంటున్నాడు. ఆ సినిమా తర్వాత కూడా వరుసగా సినిమాలు చేయాలని నిశ్చయించుకొన్నాడట చిరు. అందుకే రాజకీయాలకు స్వస్తి పలికి పూర్తిగా సినిమాలపై కాన్సన్ ట్రేట్ చేయాలనుకొంటున్నాడు చిరంజీవి. మరి తమ్ముడు పవన్ కళ్యాణ్ కోసం అన్నయ్య చిరంజీవి చేస్తున్న త్యాగం అతడికి ఏమేరకు ఉపయోగపడుతుందో తెలియదు కానీ.. రాజకీయ ప్రత్యర్ధుల్లా మిగలాల్సిన అవసరం మాత్రం లేకుండా చేస్తుంది.
