రక్తం బయటికి రాకుండా ఫైట్స్ చేసే హీరో పవన్ కళ్యాణ్.. తన సినిమాల్లో రక్తం ఏరులై పారించే డైరక్టర్ బోయపాటి శ్రీను. ఒకరు పిచ్చ క్లాస్ అయితే.. మరొకరు ఊర మాస్. రొమాంటిక్ చిత్రాలతో పవన్ క్రేజ్ సంపాదించుకుంటే.. యాక్షన్ మూవీలతో బోయపాటి బ్లాక్ బస్టర్ అందుకున్నారు. వీరిద్దరిదీ కలవని దారులు. అయినా పవన్ ని, బోయపాటిని ఒకే రూట్ పైకి తెచ్చేందుకు దర్శకరత్న దాసరి నారాయణరావు ప్రయత్నిస్తున్నారు. ఈ కలయిక కొత్త రికార్డులను సృష్టిస్తుందని ఆయన బలంగా నమ్ముతున్నారు. ఏడాది క్రితం దాసరి నిర్మాణంలో సినిమా చేస్తానని పవన్ మాట ఇచ్చారు. అప్పటి నుంచి దాసరి మంచి కమర్షియల్ కథ కోసం వెతుకులాట ప్రారంభించారు.
అనేక స్టోరీలు పరిశీలించి పవన్ ఇమేజ్ కి తగిన కథను సెలక్ట్ చేశారు. సెప్టెంబర్ 2 న పవన్ పుట్టిన రోజున ‘తారకప్రభు ఫిలిమ్స్’ ప్రొడక్షన్ నెంబర్ 38గా పవన్ సినిమా ఉంటుందని దాసరి స్పష్టం చేశారు. డైరక్టర్ గా మాస్ డైరక్టర్ బోయపాటిని తీసుకుందామని డిసైడ్ అయ్యారు. ఇప్పుడు బెల్లంకొండ శ్రీనివాస్ సినిమా ప్రీ ప్రొడక్షన్ లో బిజీగా ఉన్న బోయపాటి శ్రీను.. ఈ సినిమా తర్వాత పవన్ కథ పై వర్క్ చేయనున్నట్లు సమాచారం. అయితే పవన్ కళ్యాణ్ డేట్లు సంవత్సరం పాటు ఖాళీ లేదు.
డాలీ దర్శకత్వంలో తెరకెక్కుతున్న కాటంరాయుడు చిత్ర షూటింగ్లో ఇంకా పవన్ పాల్గొనలేదు. ఇది పూర్తి అయినా వెంటనే త్రివిక్రమ్ కాంబినేషన్లో పవర్ స్టార్ సినిమా చేయనున్నారు. దీనిని హారికా హాసిని క్రియేషన్స్ బ్యానర్లో నిర్మాత ఎస్. రాధ కృష్ణ నిర్మించనున్నారు. దీని తర్వాత దాసరి సినిమా పట్టాలెక్కనుంది. ఆలస్యం అయితే అవుతుంది కానీ పవన్, బోయపాటి దర్శకత్వంలో సినిమా చేస్తాడా? అనే సందేహం ఫిల్మ్ నగర్ వాసుల్లో తలెత్తింది. దీనికి సమాధానం కావాలంటే కొంతకాలం ఆగాల్సిందే!!.
