18 ఏళ్ళ ‘ఇంద్ర’ సినిమా వెనుక అంత కథ ఉందా?

July 24, 2020 / 05:01 PM IST

‘స్నేహం కోసం’ ఇద్దరు మిత్రులు’ వంటి ప్లాప్స్ తరువాత ‘అన్నయ్య’ అనే చిత్రంతో మళ్ళీ హిట్ ట్రాక్ ఎక్కారు మెగాస్టార్ చిరంజీవి. అయితే అటు తరువాత మళ్ళీ ఆయన్ని ‘మృగరాజు’ ‘డాడీ’ వంటి ప్లాప్స్ వెంటాడాయి. మధ్యలో ఆయన స్టార్ ఇమేజ్ కు భిన్నంగా చేసిన ‘హ్యాండ్సప్’ ‘శ్రీ మంజునాథ’ చిత్రాలు కూడా ప్లాప్స్ అయ్యాయి. ఇక మెగాస్టార్ పని అయిపోయింది అనే కామెంట్స్ కూడా మొదలయ్యాయి. అలాంటి టైంలో .. ‘బి.గోపాల్ డైరెక్షన్లో తెరకెక్కిన ‘ఇంద్ర’ చిత్రం ఇండస్ట్రీ హిట్ గా నిలిచి మళ్ళీ మెగాస్టార్ కు పూర్వ వైభవాన్ని తెచ్చిపెట్టింది. 2002 జూలై 24న ఈ చిత్రం విడుదలయ్యింది. ఈరోజుతో ఈ చిత్రం విడుదలయ్యి 18 ఏళ్ళు పూర్తయ్యింది.నిజానికి వరుస ఫ్లాప్స్ లో ఉన్న చిరు ‘ఇంద్ర’ చిత్రం చెయ్యాలి అన్ని మొదట అనుకోలేదట.

అప్పటికి మరో చిత్రానికి ఈయన గ్రీన్ సిగ్నల్ ఇచ్చారట. ‘ఫ్యాక్షన్ బ్యాక్ డ్రాప్ కథ.. అందులోనూ ఫ్యాక్షన్ గెటప్ కు నేను సెట్ అవుతానా? వద్దు’ అని చిరు దర్శకనిర్మాతలతో చెప్పారట. అందులోనూ అప్పటికే బాలయ్య ‘సమరసింహా రెడ్డి’ ‘నరసింహ నాయుడు’ వంటి చిత్రాలను చేసి ఓ బెంచ్ మార్క్ సెట్ చేసిన విషయాన్ని కూడా గుర్తుచేసి… ఆ స్థాయిలో నేను మెప్పించలేనేమో’ అని చిరు ‘ఇంద్ర’ సబ్జెక్టు ను చెయ్యను అని చెప్పారట. కానీ దర్శకుడు బి.గోపాల్, రచయితలు పరుచూరి బ్రదర్స్ పట్టుబట్టి ఒప్పించారట. అయితే చిరు గెటప్ కూడా బాగా సెట్ అవ్వాలని వారు ఎన్నో జాగ్రత్తలు తీసుకున్నట్టు కూడా తెలుస్తుంది. మొత్తానికి షూటింగ్ పూర్తయ్యింది. కానీ ఫైనల్ కాపీ చూసినప్పుడు సినిమా లెంగ్త్ 3 గంటలు దాటేసిందట.

ఈ విషయాన్ని పరుచూరి గోపాల కృష్ణగారు చిరుకి చెప్పారట. ‘3 గంటల లెంగ్త్ అంటే.. ప్రేక్షకులు విసిగిపోతారు’ అని ఆయన చెప్పడంతో..చిరు మళ్ళీ దర్శకుడితో ఎడిటింగ్ రూమ్లో కూర్చొని అనవసరమైన సన్నివేశాలను తొలగించారట. మొత్తానికి సినిమా రిలీజ్ చేసారు. చిరంజీవి టెన్షన్ తో ఉన్నారు. మొదటి ఫోన్ కాల్ దర్శకుడు కె. రాఘవేంద్ర రావు గారు చేసి.. ‘అదిరిపోయింది’ అని చెప్పారట. దాంతో ఊపిరి పీల్చుకున్నారు చిరు. ఆయన చెప్పినట్టే మొదటి షో నుండీ బ్లాక్ బస్టర్ టాక్ తో దూసుకుపోయింది ‘ఇంద్ర’ చిత్రం. 122 కేంద్రాలలో ఈ చిత్రం 100రోజులు ఆడి సరికొత్త రికార్డులు క్రియేట్ చేసింది. అంతే కాదు 35 కేంద్రాలలో 175 రోజులు కూడా ఆడింది. ఫైనల్ గా ఈ చిత్రం అప్పటి రోజుల్లోనే 27కోట్ల షేర్ ను రాబట్టింది.