సంక్రాంతి సీజన్ కు ముందు, సంక్రాంతి సీజన్ తర్వాత వచ్చే సినిమాలను ఎందుకో ఆడియన్స్ పట్టించుకోరు. ఒక 4 వారాల పాటు సంక్రాంతి సీజన్ కే రాసిచ్చేస్తూ ఉంటారు. ఈ ఏడాది కూడా అదే జరుగుతుంది. 2025 సంక్రాంతి కానుకగా 3 సినిమాలు వచ్చాయి. వాటిలో ‘సంక్రాంతికి వస్తున్నాం’ (Sankranthiki Vasthunam) సినిమా ఇప్పటికీ మంచి వసూళ్లు సాధిస్తుంది. ‘డాకు మహారాజ్’ (Daaku Maharaaj) కొంచెం పర్వాలేదు అనిపిస్తుంది. ఇక రిపబ్లిక్ డే వీకెండ్ కి కొత్త సినిమాలు వచ్చాయి.
అందులో ‘గాంధీ తాత చెట్టు’ (Gandhi Tatha Chettu) ‘హత్య’ అనే సినిమాలు పాజిటివ్ టాక్ తెచ్చుకున్నాయి.’గాంధీ తాత చెట్టు’ సంగతి ఎలా ఉన్నా ‘హత్య’ సినిమాకు పాజిటివ్ టాక్ వస్తుందని ఎవ్వరూ ఊహించలేదు. వాస్తవానికి ఈ సినిమా ఆంధ్రప్రదేశ్ కి చెందిన ఓ రాజకీయ పెద్ద(వివే*నంద *డ్డి) హత్యని ఆధారం చేసుకుని తీసింది. కాకపోతే కల్పితం చాలా ఉంది. అది టైటిల్ కార్డ్స్ లోనే చెప్పేసి సేఫ్ గేమ్ ఆడింది చిత్ర బృందం.
ఇక ఈ సినిమాలో జె.సి.ధర్మేంద్ర రెడ్డి(ఒరిజినల్ గా వివేకా**ద రెడ్డి) పాత్రని రవివర్మ (Ravi varma) పోషించారు. ఆ పాత్రలో ఈయన ఒదిగిపోయారు అనే చెప్పాలి. గెటప్ బాగా సెట్ అయ్యింది. డైలాగ్ డెలివరీ కూడా చాలా సహజంగా ఉంది. ఆయనలో ‘ఇంత మంచి నటుడు ఉన్నాడా?’ అని అంతా ఆశ్చర్యపోయేలా ఈ పాత్రని డిజైన్ చేశారు. ఇప్పటివరకు రవివర్మ చాలా సినిమాల్లో నటించారు.
కానీ ఏ సినిమాలోనూ ఈయన పాత్రలకి ఎక్కువ స్క్రీన్ స్పేస్ ఉండదు.లక్కీగా ‘హత్య’ లో ఆయనకు మంచి స్క్రీన్ స్పేస్ కూడా దొరికింది. కాకపోతే ఈ సినిమా రాంగ్ టైంలో రిలీజ్ అయ్యింది. మంచి రిలీజ్ డేట్ సెట్ చేసుకుని, సరిగ్గా ప్రమోట్ చేసుకుని రిలీజ్ చేసి ఉంటే.. రవివర్మ కెరీర్ కి కచ్చితంగా మైలేజ్ చేకూర్చేది.
