‘మర్యాద రామన్న’ (Maryada Ramanna) సినిమా ద్వారా తెలుగు ప్రేక్షకుల మనసులను దోచిన సలోనిని ఎవరు అంత ఈజీగా మర్చిపోలేరు. రాజమౌళి ఆమెను ఆ సినిమాలో చూపించిన విధానం ఎంతగానో హైలెట్ అయ్యింది. సాధారణంగా రాజమౌళి సినిమాల్లో నటించిన హీరోయిన్లకు ఊహించని రేంజ్ లో క్రేజ్ అందుతుంది. అలాంటి వారిలో కాజల్ అగర్వాల్ ఒకరు. అయితే సలోనికి (Saloni Aswani) మాత్రం ఆశించిన స్థాయి గుర్తింపు రాలేదు. టాలీవుడ్‌లో సలోని ‘ధన్ 51’ (Dhana 51) చిత్రంతో పరిచయం అవ్వగా, ఆ తర్వాత ‘ఒక ఊరిలో’ వంటి చిత్రాల్లో నటించింది.
కానీ ఇవి పెద్దగా ప్రభావం చూపలేకపోయాయి. కన్నడ, తమిళ భాషల్లో కొన్ని సినిమాలు చేసిన సలోని, ‘మర్యాద రామన్న’తో కమర్షియల్ బ్రేక్ అందుకుంది. అయితే ఆ సినిమా విజయవంతమైనప్పటికీ, ఆమెకు టాలీవుడ్‌లో పెద్ద అవకాశాలు రాలేదు. చిన్న సినిమాల్లో హీరోయిన్‌గా కనిపించినా, అవి పెద్ద విజయాలు సాధించలేదు. ఇక ఆ తరువాత ‘బాడీగార్డ్’ (Bodyguard) మరియు ‘రేసుగుర్రం’ (Race Gurram) సినిమాల్లో సపోర్టింగ్ రోల్స్ చేసింది. అనంతరం ఆమెకు పెద్ద సినిమాల్లో క్యారెక్టర్ ఆర్టిస్ట్‌గా అవకాశాలు రాలేదు.
ఇక ఇన్నాళ్లకు మెగా ప్రిన్స్ వరుణ్ తేజ్ (Varun Tej) హీరోగా నటిస్తున్న ‘మట్కా’ (Matka) సినిమాలో ఒక కీలక పాత్రను సలోని మంచి ఛాన్స్ అందుకుంది. ఇందులో ఆమె పద్మ అనే పాత్రలో కనిపించనుంది, ఈ పాత్ర ఆమెకు ఇండస్ట్రీలో కొత్త అవకాశాలు తీసుకొస్తుంది అనే నమ్మకంతో ఉంది. ఈ చిత్రం పాన్ ఇండియా రేంజ్‌లో నవంబర్ 14న విడుదలకు సిద్ధంగా ఉంది. ఇక హీరోయిన్ గా కాకపోయినా ‘మట్కా’ చిత్రం ద్వారా కనీసం క్యారెక్టర్ ఆర్టిస్ట్‌గా అయినా తెలుగులో తిరిగి బిజీ అవుతాననే ఆశతో సలోని ఎదురు చూస్తోంది.
మరి, ఈ సినిమా ఆమెకు అవసరమైన బ్రేక్ ఇస్తుందో లేదో చూడాలి. మట్కా సినిమా హీరో వరుణ్ తేజ్ కు కూడా చాలా ముఖ్యమైన సినిమా. అతని గత 3 సినిమాలు బాక్సాఫీస్ వద్ద దారుణంగా డిజాస్టర్ అయ్యాయి. దీంతో ఈ సినిమాతో మంచి హిట్ అందుకొని ఫామ్ లోకి రావాలని చూస్తున్నాడు.
