ఈ ఏడాది అజిత్ను వెండితెరపై చూడలేం. ఎందుకంటే గతేడాది ‘గుడ్ బ్యాడ్ అగ్లీ’ సినిమా వచ్చాక అజిత్ ఒక్కసారిగా రేస్ మోడ్లోకి వెళ్లిపోయాడు. విదేశాల్లో తన రేసు కారుతో రేస్లతో అలరిస్తున్నాడు. ఈ క్రమంలో ‘గ్లాడియేటర్స్ – ఇన్ పర్సూట్ ఆఫ్ ఛాలెంజ్’ అనే రేసింగ్ డాక్యుమెంటరీ కూడా చేశాడు. ఇప్పుడు తిరిగి యాక్టర్ అజిత్ అయిపోయాడు. ఇటీవలే ‘డేర్ డెవిల్’ అనే సినిమాను అనౌన్స్ చేశారు. ప్రస్తుతం ఈ సినిమా ప్రీ ప్రొడక్షన్ పనులు జరుగుతున్నాయి.
ఇన్ని రోజులు గ్యాప్ ఇచ్చి ఒక్క సినిమానే ఓకే చేస్తే ఎలా అనిపించిందో ఏమో.. వరుస సినిమాలను ఓకే చేసే పనిలో ఉన్నాడట. ఈ మధ్య కాలంలో వరుస కథలు వింటున్నాడట. అన్నీ అనుకున్నట్లుగా జరిగి రాబోయే ఎనిమిది సినిమాల లైనప్ ఫిక్స్ అయిపోయినట్లే అని చెప్పొచ్చు. ఇందులో ప్రముఖ దర్శకుడు ఎస్.ఎస్.రాజమౌళి అసిస్టెంట్ కూడా ఉన్నారట. ఇదే జరిగితే ఈ మధ్య కాలంలో జక్కన్న నుండి బయటకు వచ్చిన తొలి అసిస్టెంట్ అని చెప్పొచ్చు.
ప్రస్తుతం అజిత్.. అధిక్ రవిచంద్రన్ దర్శకత్వంలో ‘డేర్ డెవిల్’ అనే సినిమా చేస్తున్నాడు. ఈ సినిమా రెగ్యులర్ షూటింగ్ సెప్టెంబర్ నుండి స్టార్ట్ చేస్తారని సమాచారం. ఆ తర్వాత మాస్ డైరక్టర్ శివతో ఓ సినిమా చేస్తారని టాక్. ఆ సినిమా తర్వాత వైవిధ్యమైన దర్శకుడు వెంకట్ ప్రభు ఓ కథ లైన్ చెప్పి ఓకే చేయించుకున్నారు అని సమాచారం. వీటి తర్వాత తనతో ‘గ్లాడియేటర్’ అనే డాక్యుమెంటరీ తీసిన ఏఎల్ విజయ్కి అజిత్ ఓ ఛాన్స్ ఇస్తారట.
ఈ ప్రాజెక్ట్లు ఇలా ఉండగా.. భారీ చిత్రాల దర్శకుడు శంకర్, కొత్త చిత్రాల దర్శకుడు కార్తిక్ సుబ్బరాజు కథలు చెప్పారట. మరి వీటిని అజిత్ ఓకే చేస్తాడా అనేది చూడాలి. ఇక ఆసక్తికరమైన విషయం ఏంటంటే.. ఈ లిస్ట్లో ప్రముఖ దర్శకుడు ఎస్.ఎస్.రాజమౌళి టీమ్లోని అసోసియేట్ దర్శకుడు ఒకరు అజిత్కి రీసెంట్ కథ చెప్పారట. ఇవన్నీ కాకుండా ప్రశాంత్ నీల్ కూడా అజిత్తో పని చేస్తారు అనే మరో మాట కూడా వినిపిస్తోంది. దీంతో పెద్ద లైనప్పే కనిపిస్తోంది.
