హీరోల ఇంట్రడక్షన్ సాంగ్లో ఏమేం ఎలిమెంట్స్ ఉంటే బాగుంటాయి అని టాలీవుడ్లో ఓ ప్రణాళిక, మీటర్ ఉంటే.. వాటన్నింటినీ పక్కాగా పాటిస్తూ రాసిన పాట ‘పెద్ది’ సినిమాలోని ‘రై రై రారా’. అనంత శ్రీరామ్ రాసిన ఈ గీతం ఇప్పుడు మ్యూజిక్ ప్లాట్ఫామ్స్లో, షార్ట్ వీడియోస్లో మారుమోగిపోతోంది. దానికి కారణం పాట బీట్, రామ్ చరణ్ ఆట మాత్రమే కాదు అనంత శ్రీరామ్ రాత కూడా. ఓ మోటివేషనల్ క్లాస్లాగా ఆయన పాటను మలిచారు. దీని గురించి ఇటీవల ఆయన మాట్లాడుతూ ఆసక్తికర వ్యాఖ్యలు చేశారు.
‘రై రై రా రా’ పాట విడుదలైనప్పటి నుండి దూసుకెళుతోంది. తెలుగు లిరికల్ వీడియో ఇప్పటివరకు యూట్యూబ్లో 40 మిలియన్లకుపైగా వ్యూస్తో దూసుకుపోతోంది. అలాంటి ఈ సాంగ్ రాయడానికి రెండు నెలల సమయం పట్టిందని అనంత శ్రీఆమ్ తెలిపారు. ఈ పాట కోసం దర్శకుడు బుచ్చిబాబుతో కలసి చాలా ప్రయాణం చేశానని చెప్పారు. అదేంటి ప్రయాణం అనుకుంటున్నారా.. ఈ పాట ఓ పట్టాన తేలక ఓఆర్ఆర్పై కారులో చాలా రౌండ్లు కొట్టారట.
ఈ పాట ఇప్పుడు వింటున్నప్పుడు అందరూ భావోద్వేగానికి గురవుతున్నారు. అయితే కాగితంపై రాసుకుని చదువుతున్నప్పుడే ఉద్వేగం రావాలన్నది తన ప్రాథమిక ఆలోచన అని చెప్పారు అనంత శ్రీరామ్. ‘ర’కారంతో ఏదైనా పవర్ఫుల్ పదం పాట ప్రారంభంలో ఉండాలని బస్ కండక్టర్లు ఎక్కువగా వినిగియోగించే ‘రై రై’ అనే పదం పెట్టామని హుక్ లైన్ గురించి చెప్పుకొచ్చారు. ‘ఒక్కడు’ సినిమాలో సీతారామ శాస్త్రి రాసిన ‘హరే రామ హరే కృష్ణ..’ పాటలోని ‘ఆటనే మాటకర్థం నిను నువ్వే గెలుచు యుద్ధం’ అనే లైన్ రిఫరెన్స్తో ఈ పాటలో ఓ లైన్ రాశారట. ‘ఆటనుకోకోయ్.. ఆటంటే బతుకోయ్.. నీ ఆట బతకాలిరోయ్’ అనే లైన్కు ఆ పాటే స్ఫూర్తి అని చెప్పారు.
ఇక ఉత్తరాంధ్రలో ఎవరికీ పెద్దగా పట్టని ప్రాంతంలోని ఓ గ్రామం నేపథ్యంలో సాగే రూరల్ స్పోర్ట్స్ యాక్షన్ డ్రామాగా ఈ సినిమా తెరకెక్కుతోంది. మరి ‘పెద్ది’ కథేంటో తేలాలంటే ఏప్రిల్ 30 రావాల్సిందే. ఆ రోజే ‘చికిరి’తో కలసి ‘పెద్ది’ వస్తాడు.
