నిలువెత్తు రూపం అంటారు.. ఈ మాట మీరు వినే ఉంటారు. ఏదైనా వ్యక్తి గుణగణాలను గురించి వివరించడానికి రచయితలు ఈ మాట వాడుతుంటారు. ఇప్పుడు అలాంటి ప్రయత్నం పవన్ కల్యాణ్ విషయంలో చేయాలి అంటే.. ‘ఉస్తాద్ భగత్ సింగ్’ సినిమా నుండి రీసెంట్గా వచ్చిన ‘ఆరా ఆఫ్ ఉస్తాద్’ పాట వినాల్సిందే. పవన్ కల్యాణ్ వ్యక్తిత్వాన్ని అందరికీ అర్థమయ్యేలా ఆ పాటను రచించారు. దేవిశ్రీ ప్రసాద్, పి.అభిషేక్ అండ్ ది ఇండియన్ కోరల్ ఎన్సెంబుల్ ఆలపించారు. కోరస్ పవర్ ఫుల్గా ఉంది. మెడ ముట్టుకుంటే తొడ కొట్టినట్టే అంటూ మొదలైన పాట పూర్తిగా పవన్ కల్యాణ్ గురించి అర్థం చేసేలానే చంద్రబోస్ ఈ పాటను రాశారు.
మెడ ముట్టుకుంటే తొడ కొట్టినట్టే.. జుట్టు ఎగురుతుంటే ఇక దడ దడ పిడుగులు పడినట్టే.. చిరునవ్వుతో చించేస్తాడు. .కనుసైగతో కాల్చేస్తాడు.. చిటికలతో చెడుగుడు ఆడే రకం.. ఏటికి ఎదురు ఈదడమంటే ఎవ్రీ డే ముందు ఉంటాడు.. ఎవరెస్టును మించిన ధనమును వెంట్రుకల విసిరే గుణం.. మెత్తని మట్టిలో మొలిచిన మొలకవు కాదోయ్ నువ్వు.. బండరాలను బద్దలు కొట్టిన మొండి మొక్కవే నువ్వు.. ఎందరో నిన్ను ప్రేమిస్తారు.. కొందరు నిన్ను ద్వేషిస్తారు.. ఏ తరమైన నీ తరమే.. మా గుండెల్లో సుస్థిరమే అంటూ ఈ పాట సాగుతుంది.
ఈ పాట విడుదల సందర్భంగా హరీశ్ శంకర్ మాట్లాడుతూ థియేటర్కి వచ్చే ప్రతి పవన్ కల్యాణ్ అభిమాని అత్యుత్తమమైన పవన్ కల్యాణ్ని చూడాలనే తపనతో ఈ సినిమా చేశా. ఇందులో ఆయన్ను రెండు గంటలపాటు తృప్తిగా చూసుకుంటారు అని చెప్పారు. పవన్ కల్యాణ్ అభిమానులు, సినిమా ప్రేక్షకులు ఏమేం కోరుకుంటారో అన్నీ ఈ సినిమాలో పుష్కలంగా ఉంటాయి. పాటలు, డ్యాన్సులు, కామెడీ, సంభాషణలు.. ఇలా అన్నీ ఉంటాయి. ఆయనలోని వెటకారం, ఉత్సాహం, స్టైల్ ఈ సినిమాలో చూస్తారు. పవన్ రోజుకి 18 గంటలు పని చేసిన సందర్భాలు ఉన్నాయని తెలిపారు.
పవన్ కల్యాణ్పై నాకున్న ప్రేమని చూపించేలా ఓ ప్రేమలేఖలా ఈ పాట ఉండాలనుకున్నాను. ఇందులో ప్రతీ పాట ఓ పండగలా ఉంటుందని హరీశ్ పేర్కొన్నారు. ‘ఓజీ’ సినిమాకు మించిన హై ఈ సినిమాతో ఇస్తామని ఆ మధ్య నిర్మాత రవిశంకర్ చెప్పారు. ఇదంతా మనకు తేలాలంటే.. మార్చి 26 రావాల్సిందే. ఆ రోజే ‘ఉస్తాద్ భగత్ సింగ్’ థియేటర్లకు ఆగమనం.
