టాలీవుడ్లోనే కాదు, ఏ సినిమా పరిశ్రమలోనైనా సేవా గుణానికి, సామాజిక కార్యక్రమాలకు స్ఫూర్తి అంటే మెగాస్టార్ చిరంజీవి అనే చెబుతారు. బ్లడ్ బ్యాంక్, ఐ బ్యాంక్, ఆక్సిజన్ బ్యాంక్.. ఇలా ఆయన చాలా సేవలు చేశారు, చేయిస్తున్నారు, చేస్తూనే ఉన్నారు. అలాంటి ఆయన ఇప్పుడు మరో హీరోను స్ఫూర్తిగా తీసుకొని మరో సేవా కార్యక్రమం చేయడానికి ప్రణాళికలు వేస్తున్నారు. ఇక్కడో విషయం ఏంటంటే.. ఇప్పుడు చిరు స్ఫూర్తిగా తీసుకుంటున్నది.. గతంలో తనను స్ఫూర్తిగా తీసుకొని సేవా కార్యక్రమాలు మొదలుపెట్టిన హీరో గురించే.
తెలుగు సంవత్సరాది సందర్భంగా ఇటీవల ఓ టీవీ ఛానల్కు చిరంజీవి ప్రత్యేక ఇంటర్వ్యూ ఇచ్చారు. అందుకే తన సేవా కార్యక్రమాల గురించి ప్రస్తావన వచ్చింది. తన సేవా కార్యక్రమాల్ని విస్తృతం చేయనున్నట్టు చెప్పిన చిరంజీవి.. భవిష్యత్తులో తెలుగు రాష్ట్రాల్లోనే కాకుండా, దేశవ్యాప్తంగానూ పేద కుటుంబాల్లోని విద్యార్థులకు ఉచితంగా విద్యని అందించాలనే ఆలోచనకు వచ్చినట్లు తెలిపారు. వేదికలపై మీ రుణం తీర్చుకోలేనిదంటూ అభిమానులని ఉద్దేశించి మాట్లాడుతుంటాం. అలా మాటల వరకే పరిమితం కాకుండా, వాళ్లకు తిరిగి సేవ రూపంలో ఎంతో కొంత ఇవ్వగలగాలనే ఆలోచన నుంచి వచ్చిందే బ్లడ్ బ్యాంక్ అని చెప్పారు.
ప్రమాదాలు, గర్భస్రావం, తలసేమియా వ్యాధితో బాధపడుతూ, రక్తం కొరతతో ఎన్నో ప్రాణాలు పోతున్నాయనే విషయాన్ని తెలుసుకొని, నా అభిమానులందరూ రక్తదానంలో పాల్గొనేలా ప్రేరణని 25 ఏళ్ల కిందట కలిగించాను. నా ఆలోచన అక్కడితో ఆగిపోవడం ఇష్టం లేదు. ఇంకొన్ని సేవా కార్యక్రమాల్ని చేసేలా ప్రణాళికలు వేస్తున్నా. ఒక వ్యక్తి విద్యావంతుడైతే కుటుంబం మొత్తం బాగుపడుతుందనే విషయాన్ని గ్రహించి ఆ దిశగా ఆలోచిస్తున్నాను అని చెప్పారు.
తమిళ నటుడు సూర్య నన్ను స్ఫూర్తిగా తీసుకుని తమిళనాడులో ‘అగరం’ ఫౌండేషన్ని ఏర్పాటు చేశారు. విద్యా రంగంలో తను చేస్తున్న సేవా కార్యక్రమాలు నాకు కూడా ప్రేరణనిచ్చాయి. ఇప్పుడు తనను స్ఫూర్తిగా తీసుకుని, విద్యని ఎలా అందించాలో తన దగ్గర నమూనాని తెలుసుకుని ఆ దిశగా ఉచిత విద్యని అందించేందుకు కృషి చేస్తాను అని చిరంజీవి చెప్పారు. అంటే ఇప్పుడు ఆయన చిరంజీవి ఛారిటబుల్ ట్రస్ట్ లాంటిది ఏర్పాటు చేస్తున్నారని చెప్పొచ్చు.
