రెండంటే రెండు సినిమాలతో సూపర్ స్టార్ రజనీని డైరెక్ట్ చేసే అవకాశాన్ని పట్టేశాడు పా.రంజిత్. ‘కబాలి’ పేరుతో భారీ అంచనాల మధ్య విడుదలను విడుదలైన ఈ చిత్రం మిశ్రమ స్పందనతో సరిపుచ్చుకుంది. అయితే రజనీ కంటే ముందు సూర్యతో సినిమా చేయాల్సివుంది. ఈ విషయాన్ని దర్శకుడు సైతం ధృవీకరించాడు. కబాలి తర్వాత ఆ సినిమా ఉంటుందన్న ప్రచారం జరిగింది. అయితే ప్రస్తుత పరిణామాలు చూస్తుంటే ఎవరి దారి వారిదే అన్నట్టుంది.
‘కబాలి’ ఫలితంతో నిమిత్తం లేకుండా రంజిత్ కు మరో అవకాశమిచ్చారు రజనీకాంత్. పైగా ఈ చిత్రాన్ని నిర్మించేందుకు రజని అల్లుడు తమిళ స్టార్ హీరో అయిన ధనుష్ ముందుకొచ్చాడు. రజనీ ప్రస్తుతం చేస్తోన్న ‘రోబో 2’ పూర్తి కాగానే ఈ సినిమా మొదలెట్టేందుకు ప్లాన్ చేస్తున్నారు. మరోవైపు సూర్య కూడా తన కొత్త సినిమాని ప్రకటించేశాడు. నయనతారతో నానుమ్ రౌడీదాన్ (తెలుగులో నేనూ రౌడీనే) చేసిన విగ్నేష్ శివన్ ఈ సినిమాకి దర్శకత్వం వహించనున్నాడు. అనిరుధ్ సంగీతం అందించనున్న ఈ సినిమాని స్టూడియో గ్రీన్ సంస్థతో కలిసి సూర్య నిర్మించనున్నాడు. సూర్య, రంజిత్ ఇలా “ఎవరికి వారే” అన్నట్టు మెలగడానికి కాలమే కారణమా.. లేక ఇద్దరికీ ఏదైనా విషయంలో చెడిందా? అన్నది తెలియాల్సివుంది.
