తెలుగమ్మాయి తెలుగు సినిమాల్లో నటించడం కష్టం, అవకాశాలు పెద్దగా రావడం లేదు అనుకుంటున్న ఈ సమయంలో ఓ తెలుగమ్మాయి ఏకంగా పాన్‌ ఇండియా సినిమాలు, ఇంటర్నేషనల్‌ సినిమాలు చేస్తూ అలరిస్తోంది. ఆమెనే శోభిత ధూళిపాళ (Sobhita Dhulipala) . తెలుగులో ఆమె కొన్ని సినిమాలు చేసి మంచి పేరే తెచ్చుకున్నా… సోషల్ మీడియాలో మాత్రం అక్కినేని నాగచైతన్య (Naga Chaitanya) గాళ్‌ఫ్రెండ్‌గా ఆమె బాగా ఫేమస్‌. తెలుగు, తమిళ, మలయాళ భాషల్లో సినిమాలు, వెబ్‌ సిరీస్‌లతో అలరించింది శోభిత ధూళిపాళ.
ఇప్పుడు ‘మంకీ మ్యాన్‌’ సినిమాతో హాలీవుడ్‌లోకి ఎంట్రీ ఇచ్చింది. ‘స్లమ్‌డాగ్‌ మిలియనీర్‌’ సినిమాతో ఇప్పటికే మనకు పరిచయం ఉన్న దేవ్‌ పటేల్ స్వీయ దర్శకత్వంలో ఈ సినిమా తెరకెక్కింది. ఈ సినిమా ప్రచారంలో భాగంగానే శోభితపై ప్రశంసలు కురిపించాడు దేవ్‌ పటేల్. శోభిత అందాన్ని వర్ణించడానికి మాటలు సరిపోవు. అందగత్తె మాత్రమే కాదు ఆమె గొప్ప నటి కూడా అంటూ ఆకాశానికెత్తేశాడు. ‘మంకీ మ్యాన్‌’ సినిమాతో శోభిత తన పాత్రకు వంద శాతం న్యాయం చేసిందని,
ఇది ఆమెకు ఎప్పటికీ గుర్తుండిపోయే పాత్ర అవుతుందని దేవ్‌ పటేల్ చెప్పాడు. మరి అంతా ఏం నటించిందో మన దగ్గర సినిమా వస్తే చూడాలి. దాని కోసం ఏప్రిల్‌ 26 వరకు ఆగాలి. అయితే మన దగ్గర సినిమా రిలీజ్‌కి ఏవో విమర్శలు వస్తున్నాయి. అయితే ఈ సినిమా ఇప్పటికే ఏప్రిల్‌ 5న అమెరికాలో విడుదల చేశారు. అక్కడ సినిమా పాజిటివ్‌ టాక్‌ వచ్చింది. మన దేశంలో ఏప్రిల్‌ 19న తీసుకొస్తామని చెప్పారు.
అయితే పోస్ట్‌ ప్రొడక్షన్‌ పనుల్లో జాప్యం కారణంగా ఆలస్యంగా ఏప్రిల్‌ 26న రిలీజ్‌ చేయాలని నిర్ణయించారు. బలహీనుల్ని దోచుకునే బలవంతుల ఆట కట్టించేందుకు… పురాణ పురుషుడు హనుమంతుడిని స్ఫూర్తిగా తీసుకున్న హీరో ఏం చేశాడనేది సినిమా కథ. అయితే హనుమంతుడి పాత్రను స్ఫూర్తిగా తీసుకోవడం సరికాదు అంటూ విమర్శలు వస్తున్నాయి. మరి సినిమా వస్తుందా? వస్తే ఎలా ఉంటుందో చూడాలి.
