రెండు నేషనల్ బెస్ట్ యాక్టర్ అవార్డులు.. ఒక బెస్ట్ యాక్టర్ (స్పెషల్ మెన్షన్) అవార్డు అందుకున్న హీరో.. ఒక బాలనటికి ఫోన్ చేసి ‘నాకు నటన నేర్పిస్తావా’ అని అడిగారు అంటే ఆ పాపలో ఎంత టాలెంట్ ఉండాలి చెప్పండి. ఆ అవార్డులు అందుకున్న హీరోను మెప్పించిన ‘మనసులు గెలుచుకున్న’ బాలనటి నక్షత్ర. అవును ‘ఇరుముడి’ పాప నక్షత్రే. ఇక ఆ బెస్ట్ అవార్డు విన్నర్ ధనుష్ అని మీకు అర్థమయ్యే ఉంటుంది.
ఇక అసలు విషయానికొస్తే.. ‘ఇరుముడి’ సినిమాలో తన నటనలో ప్రేక్షకుల్ని మెప్పించిన బేబీ నక్షత్ర.. ఇప్పుడు ధనుష్ను కూడా మెప్పించింది. ఆ సినిమాను చూసిన ధనుష్.. దర్శకుడు శివ నిర్వాణకు వీడియో కాల్ చేసి నక్షత్రతో మాట్లాడారు. దీనికి సంబంధించిన వీడియో ఇప్పుడు సోషల్ మీడియాలో వైరల్గా మారింది. చిన్న వయసులోనే నక్షత్ర ఎంతో మెచ్యూరిటీతో ఆ పాత్రకు ప్రాణం పోసిందని అంతా మెచ్చుకుంటున్న విషయం తెలిసిందే.
తొలుత నక్షత్ర నటనను తెగ మెచ్చేసుకున్న ధనుష్.. ఆ తర్వాత మనం ఎప్పుడైనా కలిసినప్పుడు నాకు కూడా యాక్టింగ్ నేర్పిస్తావా అని అడిగారు. దీంతో ఆశ్చర్యపోయిన నక్షత్ర.. ఆ తర్వాత క్యూట్ యస్ అని చెప్పింది. తర్వాత కలుద్దాం అంటే మురిసిపోయింది. నిజానికి మణికంఠ లాంటి డెప్త్ ఉన్న పాత్రను నక్షత్ర బాగా చేసింది. సినిమాలో ఆ పాప నటనకు ఫిదా అయినవాళ్లు.. ప్రేమ భావంతో కన్నీళ్లు పెట్టుకుంటున్న వాళ్లు ఉన్నారు అంటే అతిశయోక్తి కాదు.
ఇక ఈ సినిమా గురించి చూస్తే.. ‘టాక్సిక్’ సినిమా వస్తుండటంతో ‘ఇరుముడి’ జోరు తగ్గుతుంది అని అనుకున్నారంతా. కానీ ఆ సినిమాకు ఆశించిన టాక్ రాకపోవడంతో రవితేజ మేనియా మరికొన్ని వారాలు సాగేలా కనిపిస్తోంది. చూద్దాం రవితేజ ఇంకెన్ని రికార్డులు బద్దలుకొడతాడో.
