నేచురల్ బ్యూటీ సాయి పల్లవి మలయాళంలో చేసిన “ప్రేమమ్(మలయాళం)” సినిమా సూపర్ హిట్ అయింది. తెలుగులో ఆమె చేసిన తొలి మూవీ ఫిదా కూడా సూపర్ హిట్ అయింది. దీంతో ఆమెకు గర్వం వచ్చిందని గత కొన్ని రోజులుగా వార్తలు వచ్చాయి. ఫిదా తర్వాత నాని సరసన మిడిల్ క్లాస్ అబ్బాయి మూవీ చేసింది. శ్రీరామ్ వేణు దర్శకత్వంలో తెరకెక్కిన ఈ సినిమా సెట్ లో నాని తో సాయి పల్లవి పొగరుగా ప్రవర్తించినట్లు గాసిప్స్ వచ్చాయి. దీంతో సాయి పల్లవిపై కోపంతో దిల్ రాజు ఆమెను పక్కన పెట్టారని పుకార్లు షికారు చేశాయి. ఈ వార్తలపై దిల్ రాజు నేడు స్పందించారు.
“ఈ మ‌ధ్య సాయిప‌ల్ల‌వి గురించి చాలా వార్తలు వినిపిస్తున్నాయి. “శ్రీనివాస క‌ల్యాణం” ఆఫ‌ర్‌ను సాయిప‌ల్ల‌వి రిజెక్ట్ చేసింద‌ని రాశారు. అది నిజం కాదు. అస‌లు ఆ సినిమా క‌థ కూడా సాయిప‌ల్ల‌వికి తెలియ‌దు. ఆమెను ఆ సినిమాలో హీరోయిన్‌గా అనుకోలేదు. ఇక షూటింగ్‌కు ఆల‌స్యంగా వ‌స్తుంద‌నే వార్త కూడా అబ‌ద్ధ‌మే. చెప్పిన టైమ్‌కు ప‌ర్‌ఫెక్ట్‌గా స్పాట్‌లో ఉంటుంది. మా రెండు సినిమాల‌ను సాయిప‌ల్ల‌వి చాలా కంఫ‌ర్ట‌బుల్‌గానే ఫినిష్ చేసింది” అని దిల్ రాజు స్పష్టం చేశారు. నాని, సాయి పల్లవి నటించిన మిడిల్ క్లాస్ అబ్బాయి ఈనెల 21 న రిలీజ్ కానుంది. ప్రస్తుతం సాయి పల్లవి ఏఎల్ విజయ్ డైరెక్షన్‌లో.. నాగశౌర్య హీరోగా వస్తున్న బైలింగ్వల్ మూవీలో నటిస్తోంది.
