ఇప్పటివరకు విజయ్ దేవరకొండ దేశీ భామలతోనే రొమాన్స్ చేశారు. తొలిసారి విదేశీ భామతో కలిసి నటించనున్నారు. ప్రస్తుతం అతను భరత్ కమ్మ డైరెక్షన్‌లో “డియర్ కామ్రేడ్” చేస్తున్నారు. దీని తర్వాత క్రాంతి మాధవ్ (ఓనమాలు ఫేమ్) దర్శకత్వంలో నటించడానికి ఓకే చెప్పారు. ప్రముఖ నిర్మాత కె ఎస్ రామారావు నిర్మిస్తున్న ఈ సినిమాలో ముగ్గురు హీరోయిన్స్ నటించనున్నారు. ఢిల్లీ భామ రాశి ఖన్నా, తమిళ బ్యూటీ ఐశ్వర్య రాజేష్, బ్రెజిల్ బ్యూటీ ఇజబెల్లె లు స్క్రీన్ షేర్ చేసుకోబోతున్నారు. విజయ్ దేవరకొండ చిత్రంలో ఛాన్స్ అందుకోవడంపై ఇజబెల్లె స్పందించింది. “దర్శకుడు క్రాంతి మాధవ్ నాకు కథ వినిపించగానే సౌత్ లో ఇదే తనకు సరైన డెబ్యూ మూవీ అని అనిపించింది.
అందుకే అంగీకరించా. హైదరాబాద్ కు గతంలో కొన్నిసార్లు యాడ్ షూట్ కోసం వచ్చా. కానీ తొలిసారి సినిమా షూటింగ్ కోసం హైదరాబాద్ లో అడుగుపెట్టాను” అని ఇజబెల్లె తెలిపింది. మరి తెలుగు సినిమాలు చూసారా? అని ప్రశ్నించగా.. “నాకు తెలుగు మాట్లాడడం రాదు. తెలుగులో అర్జున్ రెడ్డి, బాహుబలి సినిమాలని చూశా. ప్రస్తుత సినిమా కోసం తెలుగు నేర్చుకుంటున్నాను” అని వివరించింది. ఇప్పటికే మూడు హిందీ చిత్రాల్లో మెప్పించిన ఈ బ్యూటీ తెలుగులో ఎంతమేర ఆకట్టుకుంటుందో చూడాలి.
