నెట్ ఫ్లిక్స్ లో స్ట్రీమింగ్ అయిన ‘నయనతార : బియాండ్ ది ఫెయిరీ టేల్’ పై స్టార్ హీరో ధనుష్ (Dhanush) కేసు వేసిన సంగతి తెలిసిందే. ధనుష్ ఓ నిర్మాతగా వ్యవహరించిన ‘నానుమ్ రౌడీ దాన్’ సినిమాకి సంబంధించి 3 సెకన్ల క్లిప్ ను… అతని అనుమతి లేకుండా ‘నయనతార : బియాండ్ ది ఫెయిరీ టేల్’ లో వాడారు. ‘నయనతార : బియాండ్ ది ఫెయిరీ టేల్’ ను నెట్ ఫ్లిక్స్ సంస్థ రూ.25 కోట్లకు కొనుగోలు చేసింది.
ఈ క్రమంలో ధనుష్.. నయన్ (Nayanthara) అలాగే నెట్ ఫ్లిక్స్ సంస్థలపై కేసు వేశాడు.రూ.10 కోట్లు నష్టపరిహారం చెల్లించాలని డిమాండ్ చేశాడు. ఇందుకు నయన్ ఘాటుగా స్పందించింది. ‘షూటింగ్ స్పాట్లో తమ ఫోన్లో తీసుకున్న వీడియో ఫుటేజీ వాడుకోవడం ఎలా తప్పు అవుతుంది? మీ బుద్ధి ఎలాంటిదో నాకు తెలుసు’ అంటూ నయన్.. ధనుష్ పై మండిపడ్డ సంగతి తెలిసిందే. ఆమె భర్త విగ్నేష్ (Vignesh Shivan) కూడా ధనుష్ కి స్ట్రాంగ్ కౌంటర్ ఇచ్చాడు.
అయితే ఈ కేసులో ఫైనల్ గా ధనుష్ (Dhanush) విజయం సాధించినట్లు తెలుస్తోంది. వివరాల్లోకి వెళితే.. ధనుష్ పిటిషన్ ని సవాల్ చేస్తూ నెట్ ఫ్లిక్స్ సంస్థ వేసిన పిటిషన్ ను మద్రాసు హైకోర్టు కొట్టేసింది. నిర్మాత అనుమతి లేకుండా తన సినిమాకు సంబంధించిన క్లిప్ వాడుకోవడం తప్పే అని హైకోర్టు తీర్మానించింది.
మరోపక్క నెట్ ఫ్లిక్స్ లో టెలికాస్ట్ అవుతున్న ‘నయనతార : బియాండ్ ది ఫెయిరీ టేల్’ ని నిలిపివేయాలని కూడా ధనుష్ పిటిషన్లో కోరడం జరిగింది. దీనిపై తదుపరి విచారణను ఫిబ్రవరి 5కి వాయిదా వేసింది. ఏది ఏమైనా ధనుష్ .. నయనతార ఇష్యూపై గెలిచినట్టే అని చెప్పాలి. మరి తదుపరి విచారణను హైకోర్టు ఎలాంటి తీర్పు ఇస్తుందో తెలియాల్సి ఉంది.
