మొన్నీమధ్య రాజమౌళి (Rajamouli) , రమ కలసి ఓ పాటకు స్టెప్పులేసిన వీడియో చూశారా? ఎందుకు, ఎక్కడ ఆ డ్యాన్స్‌ వేశారు అనే విషయంలో క్లారిటీ లేదు కానీ… ఆ వీడియో అయితే భలే వైరల్‌ అయింది. ఏమాటకామాట రాజమౌళి, రమ డ్యాన్స్‌ ఇరగదీసేశారు కూడా. ఇప్పుడు ఈ టాపిక్‌ ఎందుకు అంటే… ఆ రోజు ఆయన డ్యాన్స్‌ చేసింది శ్రీసింహ పెళ్లికి సంబంధించిన కార్యక్రమంలోనేనా? అనే డౌట్‌ వస్తోంది కాబట్టి. ఈ డౌట్‌ ఎందుకు అంటే… శ్రీసింహ పెళ్లి కుదరిందని అధికారిక సమాచారం వచ్చింది కాబట్టి.
సినిమా వాళ్లు సినిమా కుటుంబాలతో సంబంధాలు కలుపుకోవడం కొత్తేమీ కాదు. మన తెలుగు చలన చిత్ర పరిశ్రమలో చాలామంది ఇలా చేశారు కూడా. అలా ప్రముఖ సంగీత దర్శకుడు కీరవాణి (M. M. Keeravani) చిన్న తనయుడు శ్రీ సింహా (Sri Simha) పెళ్లి… ప్రముఖ నటుడు, నిర్మాత, వ్యాపారవేత్త అయిన మురళీ మోహన్ (Murali Mohan) మనవరాలితో జరగబోతోంది అని అధికారికంగా తెలిసింది. ఇటీవల మురళీమోహన్‌, ఆయన కోడలు మాగంటి రూప ఓ ఇంటర్వ్యూకి వచ్చి మాట్లాడుతూ ఈ విషయం చెప్పారు.
నిజానికి శ్రీసింహ పెళ్లి వార్త కొన్నాళ్ల క్రితం బలమైన రూమర్‌గా గుప్పుమంది. అయితే ఈ విషయంలో అధికారికంగా ఎవరూ చెప్పలేదు. మీ అమ్మాయికి ఇండస్ట్రీకి చెందిన అబ్బాయితో పెళ్లి కుదిరందట నిజమేనా అని మాగంటి రూపను హోస్ట్ అడ్గా… ‘‘అవును. నిజమే సంగీత దర్శకుడు కీరవాణి గారి చిన్నబ్బాయి శ్రీ సింహాతో మా అమ్మాయి పెళ్లి నిశ్చయమైంది. ఈ ఏడాది చివర్లో పెళ్లి ఉండొచ్చు’’ అంటూ ఆమె క్లారిటీ ఇచ్చారు. ఆ లెక్కన రాజమౌళి డ్యాన్స్‌ ఆ వేడుకలోనిదా అనే డౌట్‌ మొదలైంది.
ఇక్కడే మరో డౌట్‌… కీరవాణి పెద్దబ్బాయి కాలభైరవకు ఇంకా పెళ్లి కాలేదు. కానీ శ్రీ సింహకు పెళ్లి చేసేస్తున్నారు. దీంతో బహుశా ఇది ప్రేమ పెళ్లి కావచ్చని అంటున్నారు. వారి కుటుంబ సభ్యులు ఎవరైనా ఈ విషయం చెబితే కానీ అసలు సంగతి తెలియదు. ‘మత్తువదలరా’ సినిమాతో శ్రీ సింహా హీరోగా పరిచయం అయ్యాడు. ఆ తర్వాత ‘తెల్లవారితే గురువారం’, ‘దొంగలున్నారు జాగ్రత్త’ (Dongalunnaru Jagratha) , ‘ఉస్తాద్’ (Ustaad) సినిమాలు చేసినా విజయాలు రాలేదు. ఇప్పుడు అయితే ఎలాంటి సినిమాలూ చేయడం లేదు.
