ప్రతి ఒక్కరి జీవితంలో ఒక టైమ్ అంటూ వస్తుంది.. ఆ సమయంలో ఏది ముట్టుకున్నా బంగారమే అవుతుంది. ప్రస్తుతం యంగ్ టైగర్ అటువంటి గోల్డెన్ టైం లో ఉన్నారు. అతను నటించిన జనతా గ్యారేజ్ సినిమా పై మిశ్రమ స్పందన వచ్చినా రికార్డు కలెక్షన్లను రాబట్టింది. బాహుబలి లెక్కలను పక్కన పెడితే తెలుగు చిత్ర పరిశ్రమలో అత్యధిక వసూళ్లు సాధించిన చిత్రంగా జనతా గ్యారేజ్ నిలవనుంది. వందకోట్ల మార్క్ ని దాటిన ఈ సినిమా శ్రీమంతుడు పేరు మీద ఉన్న రికార్డులను త్వరలో చెరిపేయనుంది.
టెంపర్, నాన్నకు ప్రేమతో, జనతా గ్యారేజ్ తో హ్యాట్రిక్ అందుకుని సక్సస్ రేట్ అమాంతం పెంచుకోవడంతో ఎన్టీఆర్ హాట్ హీరోగా మారారు. అందుకే అతనితో సినిమాను తీయాలని నిర్మాతలు, దర్శకులు పోటీ పడుతున్నారు. ఇంటి ముందు క్యూ కడుతున్నారు. వీరిలో తెలుగు దర్శకులే కాకుండా కోలీవుడ్ లో హిట్ చిత్రాలను తెరకెక్కించిన వారు ఉండడం విశేషం. ఈ సారి తమిళ దర్శకులకు అవకాశం ఇవ్వాలని ఎన్టీఆర్ భావిస్తున్నట్లు తెలిసింది. ఆ అదృష్టవంతుడు ఎవరో తెలుసుకోవాలని పరిశ్రమ వర్గాలు, అభిమానులు ఎదురుచూస్తున్నారు.
