టాలీవుడ్లో జూన్ లో బాక్సాఫీస్ పోటీ మరింత రసవత్తరంగా మారే సూచనలు కనిపిస్తున్నాయి. అక్కినేని హీరో అఖిల్ నటిస్తున్న ‘లెనిన్’ సినిమా రిలీజ్ డేట్పై తాజాగా క్లారిటీ వచ్చింది. ఈ చిత్రాన్ని జూన్ 26, 2026న ప్రేక్షకుల ముందుకు తీసుకురాబోతున్నట్లు స్వయంగా నాగార్జున X వేదికగా వెల్లడించారు. ఆయన సినిమా ఫస్ట్ కట్ చూసి, “కొత్త అఖిల్ను చూడబోతున్నారు” అంటూ పూర్తి నమ్మకంతో చెప్పడం ఇప్పుడు అక్కినేని అభిమానుల్లో ఆసక్తి రేపుతోంది.
ఈ సినిమాకు మురళీకృష్ణ అబ్బురు దర్శకత్వం వహిస్తుండగా, భాగ్యశ్రీ బోర్సే హీరోయిన్గా నటిస్తున్నారు. అఖిల్ కెరీర్లో ఇది కీలకమైన ప్రాజెక్ట్గా భావిస్తున్నారు, ఎందుకంటే గత సినిమాలు ఆశించిన స్థాయిలో సక్సెస్ ఇవ్వలేదు. అందుకే ‘లెనిన్’ తో భారీ హిట్ కొట్టాలనే పట్టుదలతో ఉన్నారు.
అయితే అసలు ట్విస్ట్ ఇక్కడే ఉంది. లెనిన్ రిలీజ్కు ఒక రోజు ముందే, అంటే జూన్ 25న గ్లోబల్ స్టార్ రామ్ చరణ్ నటిస్తున్న భారీ ప్రాజెక్ట్ ‘పెద్ది’ విడుదల కానుంది. ఈ సినిమాను భారీ స్కేల్ లో తెరకెక్కిస్తుండగా, పాన్ ఇండియా రేంజ్లో భారీ అంచనాలు ఉన్నాయి. యాక్షన్, ఎమోషన్, భారీ విజువల్స్ ఇలా అన్నీ కలిపి ‘పెద్ది’ బాక్సాఫీస్ను షేక్ చేయబోతుందనే విశ్లేషణలు వినిపిస్తున్నాయి.
ఇలాంటి పరిస్థితుల్లో ‘లెనిన్’ ను అదే వీకెండ్లో విడుదల చేయడం సరైన నిర్ణయమా అన్న సందేహాలు తలెత్తుతున్నాయి. ఒకవైపు హిట్ కోసం ఎదురుచూస్తున్న అఖిల్, మరోవైపు భారీ క్రేజ్ ఉన్న’పెద్ది’. ఈ పోటీ బాక్సాఫీస్ వద్ద తీవ్ర ప్రభావం చూపే అవకాశం ఉంది. ముఖ్యంగా స్క్రీన్స్, కలెక్షన్ల విషయంలో ‘లెనిన్’ కు ఒత్తిడి పెరగొచ్చు అని ట్రేడ్ వర్గాలు భావిస్తున్నాయి. మొత్తానికి, ‘లెనిన్’ రిలీజ్ డేట్ అనౌన్స్మెంట్తో ఇండస్ట్రీలో ఈ క్లాష్ ఇప్పుడు హాట్ టాపిక్గా మారింది. అఖిల్ తీసుకున్న ఈ రిస్క్ ఫలిస్తుందా, లేక పెద్ది ముందు చతికిలపడుతుందా అన్నది రిలీజ్ తర్వాతే తేలనుంది.
