‘స్పిరిట్’ సినిమా గురించి ఇప్పటివరకు వచ్చిన వార్తలు, లీక్లు అన్నీ ప్రేక్షకుల్ని సర్ప్రైజ్ చేస్తూనే ఉన్నాయి. ఎందుకంటే ఒకదానికి మించి ఒకటి అనేలా ఆ అప్డేట్స్ ఉన్నాయి. ప్రభాస్ లుక్, హీరోయిన్ ఎంపిక, విలన్ ఇలా అన్నీ ఆసక్తి పెంచుతూనే వచ్చాయి. అందుకే ఈ సినిమా గురించి ఏ చిన్న అప్డేట్ వస్తుందన్నా.. వచ్చిందన్నా భారీ ఆదరణ దక్కుతోంది. అయితే తొలిసారి ఓ అప్డేట్ ప్రేక్షకుల్ని, ప్రభాస్ అభిమానుల్ని నిరాశపరిచింది. అలా అని అప్డేట్ బాలేదా అంటే బాగుందనే చెప్పాలి. కానీ లీక్కి.. ఇప్పుడు అప్డేట్కి ఎలాంటి పోలిక లేకపోవడమే కారణం.
గత కొన్ని నెలలుగా ‘స్పిరిట్’ సినిమాకు సంబంధించి వస్తున్న పుకార్లలో అతి పెద్దది, ఆసక్తికరమైనది అంటే.. ఈ సినిమా విలన్ ఎవరు అని. ఈ సినిమా కోసం సందీప్ రెడ్డి వంగా ఔటాఫ్ది బాక్స్ ఆలోచించి కొరియన్ యాక్టర్ డాన్ లీని తీసుకున్నారు అని వార్తలొచ్చాయి. కానీ ఇప్పుడు ఆ పాత్రలో బాలీవుడ్ నటుడు వివేక్ ఒబెరాయ్ నటిస్తున్నట్లు చిత్రబృందం ప్రకటించింది. దీంతో ప్రభాస్ అభిమానులు నిరాశకు గురయ్యారు. అదే బాధను సోషల్ మీడియాలో వ్యక్తపరుస్తున్నారు.
అయితే సినిమా టీమ్ ఎక్కడా డాన్ లీ గురించి ఇప్పటివరకు చెప్పలేదు. పుకార్లు మాత్రమే వచ్చాయి. కాబట్టి ఈ విషయంలో సినిమా టీమ్ను తప్పుపట్టలేం. అలా అని వివేక్ ఒబెరాయ్ విలనీని తక్కువగా అంచనా వేయలేం. గతంలో ఆయన ఇలాంటి పాత్రలు చేసి మెప్పించారు. అందులో సందీప్ రెడ్డి వంగా విలనిజం ఇంకా కొత్తగా ఉంటుంది. ‘యానిమల్’ సినిమాలో బాబీ డియోల్ని చూశాం కదా. ఆ సినిమాతో అతడి కెరీరే మారిపోయింది. ఇప్పుడు వివేక్ని ఎలా చూపిస్తారో చూడాలి.
ఇక ఈ సినిమా విషయానికొస్తే.. వచ్చే ఏడాది మార్చి 5న రిలీజ్ చేస్తామని టీమ్ ఇప్పటికే చెప్పింది. ఈ లోపు సినిమా నుండి ఇలాంటి బ్లాస్టింగ్ అప్డేట్లు వస్తూనే ఉంటాయి.
