తమిళ అమ్మాయి సాయి పల్లవి “ప్రేమమ్(మలయాళం)” సినిమా లో అచ్చమైన మలయాళీ అమ్మాయిగా నటించి ఎన్నో అవార్డులను సొంతం చేసుకుంది. ఫిదా మూవీలో కూడా అంతే. అచ్చమైన తెలంగాణ అమ్మాయి భానుమతిగా నటించి, సొంతంగా డబ్బింగ్ చెప్పుకొని తెలుగు ప్రేక్షకులతో శెభాష్ అనిపించుకుంది. ఏ భాషలో నటిస్తే అక్కడి అమ్మాయిగా కనిపించి మార్కులు కొట్టేస్తోంది. తాజాగా బెంగాలీ భామగా మెప్పించడానికి సిద్ధమవుతోంది. కృష్ణ గాడి వీర ప్రేమ గాధ విజయం తర్వాత హను రాఘవపూడి చేసిన లై మూవీ నిరాశపరచడంతో.. ఈ సారి ఎలాగైనా హిట్ కొట్టాలని హను మంచి లవ్ స్టోరీని తీసుకున్నారు.
హీరో హీరోయిన్లుగా శర్వానంద్, సాయి పల్లవిని తీసుకున్నారు. ఈ మూవీ వేగంగా షూటింగ్ జరుపుకుంటోంది. మొన్న సాయి పల్లవి పుట్టినరోజు సందర్భంగా ఆమె స్టిల్స్ రిలీజ్ చేశారు. అందులో బెంగాలీ భామగా చీరకట్టులో తెగ ఆకట్టుకుంది. ఈ చిత్రంలో ఆమె మెడికల్ స్టూడెంట్ గా కనిపించబోతున్నట్టు తెలిసింది. కలకత్తా నేపథ్యంలో సాగే ఈ మూవీ యువతని ఆకట్టుకుంటుందని చిత్ర బృందం ధీమాగా చెబుతోంది. మహానుభావుడు తర్వాత శర్వానంద్ చేస్తున్న ఈ సినిమాపై అంచనాలు భారీగానే ఉన్నాయి.
