15 ఏళ్ల వయసులో ఒక కుర్రాడు వచ్చి మన దగ్గర హీరో అయిపోవచ్చు. చిన్న వయసులోనే హీరో అయిపోయాడు అని గొప్పలు చెప్పుకోవచ్చు. కానీ ఒక అమ్మాయి అదే వయసులో వచ్చి హీరోయిన్ అయితే వెంటనే ఏజ్ టాపిక్ తీసుకొచ్చేస్తారు. ఆ వెంటనే హీరోతో వయసు తేడా లెక్కలేసి పెద్ద పంచాయితీ చేస్తారు. తాజాగా ఇలాంటి ఇబ్బంది పడుతున్న హీరోయిన్ సారా అర్జున్. ‘ధురంధర్’ సినిమాతో హీరోయిన్గా మారిన చైల్డ్ ఆర్టిస్ట్ సారా. ఇటీవల మీడియాతో మాట్లాడుతూ ఇండస్ట్రీ పరిస్థితుల గురించి, తన వయసు గురించి మాట్లాడింది.
చిన్నప్పుడు ఆమె ఓసారి తల్లిదండ్రులతో షాపింగ్ మాల్కు వెళ్లినప్పుడు ఆమెను చూసి ఓ బ్రాండ్లో నటించాలని అడిగారట. ఆ ప్రకటనను ముఖేశ్ చబ్రా చిత్రీకరించారట. తర్వాత ఆయనే కొన్నేళ్ల తర్వాత ఆడిషన్కి రమ్మని పిలిచారట. అయితే అది ‘ధురంధర్’ సినిమా కోసమని సారాకి తెలియదట. స్క్రిప్ట్ భిన్నంగా ఉండటంతో ఆడిషన్లా ఇచ్చి వచ్చిందట. ఆ తర్వాత ఆ విషయం గురించి మర్చిపోయిందట. ఆ తర్వాత ఒక నెలకు వేర్వేరు సన్నివేశాలతో మరో ఆరు ఆడిషన్లు ఇచ్చిందట. ఈ సమయంలో ఆమె వయసు గురించి చాలా చర్చలు జరిగాయట. కాబట్టి ఇప్పుడు వస్తున్న చర్చలు పెద్ద విషయం కాదన్నమాట.
ఇక వృత్తిపరంగా ఏం జరిగినా దాని గురించి నేను నా తల్లిదండ్రులతోనే షేర్ చేసుకుంటాను. ఆ తర్వాత నా బ్రదర్కి చెబుతాను. ఇండస్ట్రీలో పేరు వచ్చినప్పుడు విమర్శలు కూడా వస్తాయని తెలుసు. చిన్నప్పుడు ఈ విషయాలు పెద్దగా తెలిసేవి కాదు. నా వరకు సినిమాకు ఏం కావాలో అది చేస్తాను. నా వ్యక్తిగత జీవితాన్ని కాపాడుకోవడం నాకు ఇష్టం. దాని గురించి తక్కువ మాట్లాడటం మంచిది అని అనుకుంటాను. అలా ఉంటేనే ఏ అవకాశం వచ్చినా చేయడానికి సిద్ధంగా ఉంటాం. చాలా కాలంగా ఇదే చేస్తున్నాను. ఇకపై చేస్తాను కూడా అని తన తత్వం గురించి చెప్పింది సారా.
