శర్వానంద్ నటించిన తాజా చిత్రం ‘పడిపడి లేచే మనసు’ చిత్రం డిసెంబర్ 21 న విడుదల కాబోతున్న సంగతి తెలిసిందే. హను రాఘవపూడి డైరెక్ట్ చేస్తున్న ఈ చిత్రంలో సాయి పల్లవి హీరోయిన్. ఇక ఈ చిత్రం చేస్తూనే సుధీర్ వర్మ డైరెక్షన్లో మరో చిత్రాన్ని స్టార్ట్ చేసాడు శర్వానంద్. సితార ఎంటర్టైన్మెంట్స్ నిర్మిస్తున్న ఈ చిత్రం ఇప్పటికే మూడు షెడ్యూల్స్ పూర్తి చేసుకున్నట్టు సమాచారం.
ఈ చిత్రానికి సరైన టైటిల్ కోసం గాలిస్తున్నారట చిత్ర యూనిట్. అదేంటో గతంలో సుధీర్ వర్మ డైరెక్షన్లో వచ్చిన నాగ చైతన్య ‘దోచేయ్’ చిత్రానికి కూడా సరైన టైటిల్ కోసం చాలా కసరత్తులు చేసిన సంగతి తెలిసిందే. ఇప్పుడు మళ్ళీ సుధీర్ వర్మ అదే పరిస్థితిని ఎదుర్కొంటున్నాడు. మొదట్లో ‘దళపతి’ అనే టైటిల్ ను అనుకున్నప్పటికీ అది సూటవ్వక పోవడంతో మరో టైటిల్ కోసం వెతుకుతున్నారట చిత్ర బృందం. ఇక పిరియాడికల్ యాక్షన్ డ్రామాగా తెరకెక్కుతోన్న ఈ చిత్రంలో రెండు షేడ్స్ ఉన్న పాత్రలో శర్వా కనిపించనున్నాడట. అందులో ఒకటి ‘మాఫియా డాన్’ అని టాక్.
